Drejtoresha e Institutit të Shëndetit Publik, ka deklaruar se janë shtuar edhe 13 raste të reja me COVID-19 në vendin tonë, nga 33 testime të kryera për 24 orë. Fico ka bërë me dije se 8 persona janë nga Tirana, 1 nga Kavaja, 1 nga Durrësi dhe 3 qytetarë nga Korça, duke e çuar numrin total të të prekurve në 89 raste.
“Nga totali i rasteve të konfirmuara, 58% janë meshkuj dhe 42% janë femra. Mosha mesatare e totalit të rasteve pozitive është 48 vjeç,”shprehet Fico.
Ndërsa për sa i përket shpërndarjes gjeografike të rasteve pozitive, mbetet në kryesim Tirana me 63 qytetarë.
Durrës 6 qytetarë
Lushnje 2 qytetarë
Elbasan 2 qytetarë
Fier 8 qytetarë
Rrogozhinë 2 qytetarë
Kavajë 3 qytetarë
Korçë 3 qytetarë.
Fico bëri me dije gjithashtu se 3 personat e shëruar kanë lënë aktualisht spitalin për të qëndruar 14 ditë në vetizolim. Ndërsa, në Spitalin Infektiv janë 43 pacientë dhe 4 prej tyre janë në terapi intensive.
“Mosha mesatare e rasteve të hospitalizuara është 54 vjeç. Jemi duke vijuar me testimin e rasteve të dyshuara, si element i rëndësishëm për ndërprerjen e zinxhirit të transmetimit të infeksionit COVID-19. Nga ana tjetër, për të siguruar suksesin e ndërprerjes së këtij transmetimi, qytetarët kanë një rol thelbësor. Qytetarët duhet të vazhdojnë të vetizolohen dhe të shmangin sa më shumë kontaktet. Ministria e Shëndetësisë dhe Mbrojtjes Sociale i drejtohet edhe një herë me një lutje qytetarëve: Mos shkoni menjëherë në spital! Ministria ka vënë në dispozicion një linjë të gjelbër falas 0800 40 40 për çdo qytetar që kërkon informacion apo këshilla në lidhje me COVID-19,” u shpreh Fico, ndërkohë që i bën thirrje qytetarëve që të respektojnë masat e përditshme të distancimit social.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.