.png)
Nga Blerina Goce - Shumica prej nesh largohen nga shtëpia duke mbajtur me vete tre gjëra kryesore: çelësat, portofolin dhe një smartphone.
Ky i fundit, në jo pak raste ka filluar të shërbejë edhe si një arkë parash përmes të cilit mund të kryejmë pagesa të ndryshme.
Në Shqipëri, një në dhjetë konsumatorë përdorin smartphone për të paguar dhe kryer transaksione, ndërsa 30 për qind e të gjithë të anketuarve është e interesuar të përdorë këtë mundësi pagese në të ardhmen.
Studimi rajonal i kryer nga Visa tregon rritjen e ndërgjegjësimit midis qytetarëve shqiptarë në lidhje me nevojën për të aplikuar teknologji moderne, duke zbuluar gjithashtu hapësirë të konsiderueshme për të përmirësuar opsionet inovative për pagesa pa kontakt nga pala tregtare.
Pothuajse 80 përqind e të anketuarve treguan se përvoja e tyre personale me mënyra të ndryshme pagese ndikoi në zgjedhjen e tyre të mënyrës së pagesës.
Të anketuarit përmendin lehtësinë (44 përqind), shpejtësinë (39 përqind) dhe mungesën e rrezikut për të humbur portofolin me para (37 përqind) si përfitimet më të mëdha të pagesave nga celulari. Rreth 45 për qind e të gjithë të anketuarve besojnë se përdorimi i një smartphone për të paguar është më i sigurt për sa i përket masave shëndetësore që lidhen me Covid-19.
Kur iu kërkua të rendisnin të gjitha mallrat dhe shërbimet për të cilat janë të gatshëm të paguajnë nëpërmjet smartphone, faturat mujore dhe shërbimet e parkimit janë në krye të listës (40 përqind), ndërsa biletat e teatrit, kinemasë dhe transportit publik vijnë në vendin e dytë (35 përqind).
E treta në radhë është porosia e ushqimit (28 përqind), ndërsa pagesat në dyqane, kafene dhe restorante vijnë të katërtat (24 përqind). 22 përqind e të anketuarve janë shumë të interesuar për blerjet e mëdha të biletave për udhëtime ose blerjet e mobiljeve.
“Ne besojmë se pagesat nga celulari së shpejti do të bëhen pjesë e rutinës ditore të së gjithëve në rajonin e Evropës Juglindore, pasi ato ofrojnë komoditet, shpejtësi dhe siguri për shkak të metodave inovative të vërtetimit përmes gjurmëve të gishtave dhe ID-së së fytyrës. Duhet kohë për të pranuar zgjidhje të reja teknologjike, por pagesat celulare duhet të shikohen si një faktor i ri i formës që mundësohet nga zhvillimi i teknologjisë në një mënyrë të ngjashme si kartat pa kontakt kur ato u prezantuan për herë të parë. Duke pasur parasysh familjaritetin dhe përdorimin e teknologjisë pa kontakt në të gjitha vendet e rajonit, ne mendojmë se pranimi i pagesave celulare mund të ecë me një shpejtësi edhe më të lartë,” shprehet Vladimir Djordjevic, Drejtori i Përgjithshëm i Visa për Evropën Juglindore.
Kur bëhet fjalë për vendet e rajonit, Maqedonia e Veriut kryeson për sa i përket pranimit të pagesave me celular - më shumë se një e treta e konsumatorëve e përdorin këtë mundësi gjatë kryerjes së transaksioneve ditore.
Mali i Zi, Bosnja dhe Hercegovina dhe Serbia shënojnë rezultate të mira, me rreth një të katërtën e të anketuarve që paguajnë me nje një prekje nga celulari.
Pavarësisht zakoneve të ndryshme, hulumtimet tregojnë se konsumatorët nga rajoni tregojnë gatishmëri për të adoptuar teknologji moderne, qofshin ato pagesa apo metoda identifikimi, dhe për të provuar veçori të reja të smartphone-ve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
