Kryeministri Edi Rama u takua në Berlin me Kancelaren gjermane Angela Merkel. Sipas një postimit të Ramës një ditë më parë, tema kryesore e këtij takimi ka qenë programi i rindërtimit në vigjilje të konferencës së donatorëve, që BE organizon për këtë temë më 17 shkurt në Bruksel.
Në këtë vizitë, shefi i Qeverisë shqiptare shoqërohej nga kreu i Grupit Parlamentar socialist, Taulant Balla dhe ministri i Rindërtimit, Arben Ahmetaj.
Institucionet shqiptare nuk kanë publikuar ende zyrtarisht një faturë për dëmet e shkaktuara nga tërmeti, por gjatë vizitës në Itali, Kryeministri Edi Rama tha se bëhet fjalë për një dëm prej 1 miliard euro.
Ndërkohë sipas mediave gjermane, kancelarja Angela Merkel u ndal tek integrimi europian i vendit tonë duke deklaruar se do të kërkojë hapjen e bisedimeve të pranimit me Shqipërinë dhe Maqedoninë e Veriut në samitin e Bashkimit Europian në mars.
"Ne dëshirojmë të arrijmë një marrëveshje në mbledhjen e ardhshme të Këshillit Europian në mars për të hapur negociatat me Shqipërinë, si dhe me Maqedoninë e Veriut," u tha ajo gazetarëve në Berlin pas takimit me kryeministrin shqiptar.
"Të dy vendet kanë arritur shumë. "Tani do të punojmë shumë për të arritur rezultatet e dëshiruara në mars", shtoi ajo
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.