Vijon merkato dhe Partizani ka bërë zyrtarizmin radhës në këtë janar. Pas një sulmuesi dhe një mesfushori, këtë herë “klubi i kuq” ka bërë një afrim në repartin e mbrojtjes. Blerja më e re e Partizanit quhet Lum Rexhepi. Mbrojtësi 26-vjeçar nga Kosova vjen nga kampionati finlandez, ku deri më tani ishte pjesë e skuadrës, Kups.
Rexhepi pritet të jetë një vlerë e shtuar për stolin e skuadrës së Skënder Gegës, pasi nuk besohet që të jetë zgjedhje e parë për të qëndruar para Alban Hoxhës që nga minuta e parë. Futbollisti kosovar ka firmosur deri në fund të këtij sezoni me Partizani me të drejtë rinovimi edhe për sezonin e ardhshëm. Futbollisti i është bashkuar skuadrës së Partizanin para disa ditësh, por pasi është parë më nga afër nga trajneri Gega dhe drejtuesit e tjerë të të kuqve është vendosur për t’i ofruar atij një kontratë.
Rexhepi më herët ka qenë edhe pjesë e përfaqësueses së Kosovës, ku regjistron vetëm një ndeshje të luajtur në miqësoren përballë Dinamos së Zagrebit. Me këtë afrim, merkato e Partizani mund të konsiderohet e mbyllur edhe pse në klub të gjithë presin dhe një sulmues të nivelit të lartë që të përballojë fazën e dytë të kampionatit, që pritet të jetë shumë e fortë. Partizani pasditen e së hënës u mund në miqësore nga kroatët e Dinamos së Zagrebit dhe ka mbyllur fazën përgatitore në Antalia të Turqisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.