.png)
Gazeta Si - Një fabrikë bojërash në Maminas është djegur rreth orës 22:30 të mbrëmjes së të shtunës pranë autostradës Tiranë-Durrës..
Forcat zjarrfikëse nga të gjitha qytetet e Qarkut të Tiranës luftuan me flakët për 5 orë deri në orët e para të ditës së sotme.
Në momentin që ka rënë zjarr, brenda në fabrikë nuk ka patur punonjës, por vetëm rojet të cilët kanë qenë në ambientet e jashtme të fabrikës.
Nga përhapja e flakëve nuk ka asnjë person të dëmtuar. Policia evakuoi banorët që jetonin pranë fabrikës dhe bllokoi për disa orë kalimin në autostradën Tiranë-Durrës.
Lëndët kimike që ndodheshin brenda fabrikës si lëndë e parë për prodhimin e bojërave kanë ndihmuar që zjarri të përhapej dhe të shkaktonte dëme të shumta materiale.
Dëmet në magazinën e bojërave në Maminas mendohen të jenë të pallogaritshme, teksa shkaqet e zjarrit janë ende të paqarta.
Situata në fillim ishte tepër e rëndë pasi pranë magazinës ndodheshin dhe disa depozita gazi, por që zjarrfikësit bën të mundur që flakët të mos shkonin në drejtim të tyre.
Gjithashtu, efektivët e policisë evakuuan dhjetëra persona që ishin në një lokal dasmash në momentet që shpërtheu zjarri, teksa u ndërpre energjia për shkaqe sigurie.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
