Presidenti i Maqedonisë së Veriut, Stevo Pendarovski, ka mandatuar kreun e LSDM-së, Zoran Zaev që të formojë qeverinë e re.
Pas mandatimit, Zoran Zaev tha se Maqedonia e Veriut do të sigurojë një qeveri për rrugën drejt Bashkimit Evropian.
“Programi qeveritar do të jetë në pjesë më të madhe i dedikuar në ekonomi, në rritjen e pagave dhe pensioneve, në investime në të rinjtë, në rritje dhe zhvillim, në kujdes për më të varfrit, në mbështetje të biznesit në vend. Do të udhëheq një qeveri e cila nuk del për devijim nga rruga dhe e cila pas anëtarësimit në NATO, vazhdon drejt anëtarësimit në BE”, tha Zaev.
Duke nisur nga sot, Kreu i LSDM-së brenda 20 ditëve do të duhet të sigurojë shumicën parlamentare prej 61 deputetësh për formimin e qeverisë së re.
Ndërkohë, i pyetur për bisedimet me LSDM-në dhe për çështjen e kryeministrit shqiptar, kreu i BDI-së Ali Ahmeti tha se partia që ai drejton nuk do të veprojë me eufori dhe folklorizëm.
“Bashkimi Demokratik për Integrim është faktor stabiliteti në vend dhe për derisa është i vetëdijshëm për misionin për zhvillimet, BDI nuk do të veprojë as me eufori as me folklorizëm e as me presione nga rruga, por do të zgjedhë rrugën e duhur, me qëllimin sa ma të mirë që do ti shërbejnë vendit”, tha ai.
Ahmeti i bëri këto komente pas dështimit të ftesës së tij për të mbledhur në një takim partitë politike shqiptare.
Asnjëri nga drejtuesit e partive nuk u paraqit në orarin e paracaktuar.
Krerët e partive Ziadin Sela, Afrim Gashi dhe Bilall Kasami kërkuan më pak fjalë, rend të qartë të diskutimit dhe mandej një takim me Ahmetin duke nisur nga e hëna tjetër.
“Desha të dëgjoj mendimet e tyre se si ta bëjmë politikën me të shëndoshë, si te jemi më të fortë e të bashkuar qe të jemi me të suksesshëm”, reagoi Ahmeti gjatë një takimi me gazetarët.
Bisedimet mes LSDM dhe BDI kanë mbetur te çështja e Kryeministrit. Ali Ahmeti kërkon qe 1 vit kryeministri të jetë shqiptar dhe 3 vite maqedonas. Pavarësish nëse do të jetë në fillim apo në fund të mandatit 4 vjeçar, BDI propozon edhe rotacion në krye të parlamentit. Kreu i tij të jetë shqiptar kur kryeministri është maqedonas dhe anasjelltas.
,
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.