.png)
Një 34-vjeçar shqiptar, i identifikuar si Ergys Dashi me origjinë nga Durrësi u vra me armë zjarri në Ekuador në restorantin “Grilling”, në “Avenue José Joaquín Orrantia”, në veri të Guajakilit në Ekuador.
Sipas shtypit ekuadorian, ngjarja ka ndodhur mbrëmjen e të shtunës në 22 janar rreth orës 19:00, kur dy persona mbërritën në ambientet e restorantit me një “Ford Explorer” ngjyrë të zezë.
Un hombre fue acribillado hace pocos minutos en un restaurante ubicado frente al Mall del Sol. El sicario ingresó al local y acribilló a la víctima que estaba comiendo @eluniversocom pic.twitter.com/VXNhMeGSzP
— Carolina Pimentel Ja (@CaropimentelJ) January 23, 2022
Në vendngjarje, ekspertët e kriminalistikës kanë grumbulluar mbi 20 gëzhoja fishekësh të markës “Fame”, tip 9x19, sipas karakteristikave të dhëna nga hetuesit. Gjithashtu u konstatua se viktima ka marrë disa plumba në pjesën ballore të kokës.
Fillimisht nuk dihej identiteti i të ndjerit, por pas dërgimit të trupit të pajetë në Laboratorin e Kriminalistikës, u zbulua identiteti i tij dhe origjina nga Shqipëria.
Dashi kishte disa kohë që jetonte përkohësisht në Guajakil të Ekuadorit, ndërsa dyshohet se aktiviteti i tij në këtë shtet, ka qenë trafiku i lëndëve narkotike.
Autori me buqetë me lule qëlloi papritur
Njëri hyri me një buqetë me lule në dorë, ndërsa tjetri, i veshur me kapuç, qëndronte në derë me një armë në dorë. Punonjësit e restorantit thanë se vrasësi ka dashur të hyjë me pretekstin e dorëzimit të disa luleve, por ka kërcënuar një punonjës që i ka kërkuar kartën e vaksinimit para se ta linte të kalonte.
Pasi hyri, ai qëlloi Ergys Dashin, i cili po priste pjatën e tij për të ngrënë dhe ishte në shoqërinë e një burri tjetër që u zhduk nga vendi i ngjarjes. Ky i fundit reagoi ndaj vrasësve edhe pse nuk kishte armë, por ata e qëlluan edhe atë, por pa e lënduar fizikisht.
Viktima ishte ulur në fund të restorantit, i cili në atë kohë ishte plot. Kur filluan të shtënat, klientët filluan të vrapojnë të dëshpëruar. Disa arritën të largoheshin nga restoranti, të tjerët u hodhën në dysheme dhe u mbuluan derisa sulmi përfundoi.
Në vendngjarje u gjetën të paktën 28 prova balistike të dy kalibrave. Dëshmitarët thanë se disa të shtëna erdhën edhe nga jashtë lokalit.
Teksa po largoheshin, autori i maskuar me kapuç qëlloi të paktën 20 të shtëna në drejtim të restorantit dhe më pas u largua me motoçikletë.
Një grua që ndodhej në lokal u qëllua në këmbë, thanë dëshmitarët. Ajo u dërgua në një spital aty pranë dhe është jashtë rrezikut për jetën.
Një ambulancë dhe zjarrfikësja mbërriti në restorant për t’i dhënë ndihmën shqiptarit, por mjekët konfirmuan vetëm vdekjen e tij, i cili kishte veshur pantallona të shkurtra të zeza dhe bluzë të së njëjtës ngjyrë.
Kush është viktima
Dashi në vitin 2014 është arrestuar nga policia italiane po për kultivim droge, si pjesë e një operacioni që çoi prapa hekurave 32 persona.
Trafiku i heroinës drejtohej nga shqiptari Ergys Dashi, në atë kohë vetëm 25 vjeç, i cili përfundoi pas hekurave pas një hetimi 3-vjeçar nga autoritete italiane në Pulia. Transporti i drogës, heroinë e cilësisë së shkëlqyer, bëhej përmes makinave të modifikuara.
Vitet e fundit disa shtetas shqiptarë janë ekzekutuar në Ekuador si të përfshirë në trafikun e kokainës. I fundit ka qenë Adriatik Tresa, i cili u vra pikërisht në Guajakili.
Ndërkohë që në burg në qelitë e këtij shteti, vijon të jetë Dritan Rexhepi, i cilësuar si kreu narko-trafikut nga Amerika Latine në Europë.
Mediat ekuadoriane raportojnë se deri më tani për këtë vit 2022, në Zonën 8 (Guayaquil, Durán dhe Samborondón), janë regjistruar 74 vdekje të dhunshme. Vitin e kaluar në të njëjtën periudhë ishin 20 raste. Rritja është më shumë se 210%.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
