Gazeta Si - Vetëdorëzohet në polici pas dy vitesh arrati Daniel Pepaj, i cili akuzohet se është autor i vrasjes së dy kushërinjve Klement Pepaj dhe Vilson Çutaj, në Malësinë e Madhe për shkak të konfliktit për parcelat e mbjella me kanabis sativa.
Ngjarja u regjistrua në 3 tetor 2020 në pyjet e fshatit Vrith në Malësinë e Madhe. Uniformat blu thonë se Pepaj është një person me rrezikshmëri të lartë shoqërore.
“Ky shtetas ishte shpallur në kërkim, pasi Gjykata e Shkodrës i ka caktuar masën e sigurisë “Arrest në burg”, për veprat penale “Vrasja me paramendim”, e kryer në bashkëpunim”, “Mbajtja pa leje e armëve, armëve shpërthyese dhe municionit luftarak” dhe “Kultivimi i bimëve narkotike””, njoftoi policia.
Në 3 tetor 2020, Klement Pepaj, Vilson Çutaj dhe Danjel Pepaj humbën kontaktet me familjarët e tyre. 5 ditë më vonë, Klement Pepaj dhe Vilson Çutaj u gjetën të ekzekutuar me armë zjarri në një zonë të thellë malore.
27-vjeçari Danjel Pepaj që prej atij momenti u shpall në kërkim si autori i dyshuar i ngjarjes, për t’u arrestuar vetëm këtë të premte.
Shkak për krimin e rëndë dyshohet se u bë konflikti për vjedhjen e një sasie me kanabis që viktimat akuzonin se ua kishte marrë kushëriri i tyre, pikërisht 27-vjeçari Danjel Pepaj
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.