.png)
Nga Gazeta ‘Si’-Zëvendëskryeministri i Kosovës Besnik Bislimi deklaroi se i kushtojnë zero rëndësi propagandës që sipas tij po mundohet ta bëjë ministri i Brendshëm i Serbisë, Ivica Daçiç, me rastin e Faton Hajrizit, i cili dyshohet për vrasjen e një polici dhe plagosjen e një tjetri në Lloznicë të enjten.
Ai tha se vendet mike e dinë qartë se çfarë narrative po do të ndërtojë Serbia.
“Ne i kushtojmë zero rëndësi propagandës së Daçiç. Vendet anëtare, vendet mike e kanë të qartë dhe e dinë shumë mirë se cila është narrativa që po don me kriju Serbia: ‘Ne kemi kriminelë, ne jemi strehë e kriminelëve por edhe Kosova nuk është më mirë’. Ata po mendojnë që e pastrojnë veten duke e njollosur Kosovën”, ka thënë Bislimi.
Ai u shpreh se Faton Hajrizi për Kosovën është një person i dënuar për vepra penale.
Sipas tij, Kosova e konsideron kriminel Hajrizin, ndërsa Serbia e sheh hero Milan Radoiçiqin, organizatorin e sulmit të 24 shtatorit në Banjskë, ku u vra polici Afrim Bunjaku.
Bislimi ka thënë se Serbia po mundohet të manipulojë me vetëm një pasaportë të gjetur.
“Ne nuk kemi konstatime. I gjithë konstatimi, e gjithë historia me të cilën po manipulojnë tani më shumë se 24 orë është një pasaportë e gjetur. Dhe mbi një pasaportë është ndërtuar një roman. Pjesa tjetër përtej pasaportës është produkt i makinerisë propaganduese të Beogradit. Mendoj se duhet të shihet si e tillë”.
Faton Hajrizi u vra të premten nga policia serbe.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
