Gjykata Administrative ka rrëzuar kërkesën për dëmshpërblim të familjarëve të ish-komisarit Artan Cuku, i vrarë në 8 prill të vitit 2017 në hyrje të shtëpisë pranë Liqenit Artificial.
Familjarët i kërkuan ministrisë së Brendshme dëmshpërblim në shumën e 1 milionë eurove për vdekjen e ish-drejtuesit të policisë, i cili ishte kërcënuar dhe më parë.
Në padinë e dorëzuar në gjykatë për dëmshpërblim monetar dhe moral, familja thotë se i është shkaktuar një dëm i konsiderueshëm pasuror dhe jo pasuror nga vrasja e të afërmit të tyre.
Madje, në padi, familja akuzon se Cuku u largua në mënyrë të paligjshme nga puna, nuk u rikthye dhe nuk u mbrojt, madje s’iu la as arma në zotërim.
Gjithashtu, familja akuzon se është e qartë që vdekja ka ardhur midis të tjerash për shkak të heqjes së tij të paligjshme nga puna.
Nga hetimet e prokurorisë rezultoi se shkak i vrasjes së tij ishte hakmarrja për shkak të detyrës në kohën kur Cuku ka qenë drejtues në Vlorë.
Deri tani i vetmi i arrestuar për vrasjen është Mikel Shallari, ekzekutori i dënuar me 10 vite burg, ndërkohë Bledar Jambelli për të cilin prokuroria ngriti akuzën si porositës, u arrestua në dhjetor të vitit 2018 në Greqi, por më pas u la i lirë nga gjykata greke.
Sipas prokurorisë Jambelli urdhëroi vrasjen e kryekomisarit për shkak se ai e kishte arrestuar në kohën kur mbante detyrën e Drejtorit të Policisë së Vlorës.
Mikel Shallari ka marrë statusin e bashkëpunëtorit të drejtësisë dhe rrëfeu emrin e porositësit. Para pak muajsh, Artan Cuku u shpall “Dëshmor i Atdheut” me një vendim të qeverisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.