.png)
Prokuroria e Krimeve të Rënda ka përfunduar hetimet për Mikel Shallarin, vrasësin e komisarit të policisë Artan Cuku dhe e ka dërguar në gjykatë dosjen penale.
Mikel Shallari i dyshuar si autor i krimit, akuzohet se ka kryer veprat penale “Vrasje për shkak të cilësive të veçanta” në bashkëpunim, dhe “mbajtje pa leje të armëve luftarake”.
Këto dy vepra penale sipas prokurorisë, Shallari i ka kryer në bashkëpunim me porositësin e vrasjes shtetasin Bledar Jambelli dhe ndërmjetësin Kristaq Leci, të cilët janë shpallur në kërkim dhe po hetohen në një dosje të veçuar tek Krimet e Rënda.
24 vjecari Mikel Shallari pritet t’i shpëtojë dënimit me burgim të përjetshëm pasi ai ka bashkëpunuar me Prokurorinë duke pranuar autorësinë e krimit dhe duke treguar ndërmjetësin dhe porositësin e vrasjes së Cukut.
Bashkë me dosjen penale ku ka renditur provat e akuzës, prokuroria ka dorëzuar në gjykatë edhe aktin e marrëveshjes me të pandehurin Mikel Shallari.
Nëse gjykata i konsideron të vlefshme procedurat e ndjekura nga Prokuroria dhe deklarimet e dhëna nga i arrestuari, 24-vjeçari Mikel Shallari mund ta marrë statusin e bashkëpunëtorit të drejtësisë duke përfituar edhe ulje dënimi.
Mikel Shallari u identifikua nga kamerat e sigurisë dhe rrobat e përdorura në atentat të cilat i hodhi në një kosh mbeturinash në zonën e Tiranës së Re.
Komisari Artan Cuku, ish drejtues policie, sipas prokurorisë, u vra për shkak të detyrës së tij në Policinë e Vlorës. Në vitin 2012, ai ka drejtuar një operacion ku ka arrestuar Bledar Jambellin, si person të dyshuar për një vrasje të ndodhur në qytetin e Vlorës. Në vitin 2014 Bledar Jambelli rifitoi lirinë nga gjykata e Apelit të Vlorës me argumentin se ekspertiza e gjurmëve të gishtave në makinën e përdorur gjatë vrasjes në qytetin jugor ishte e parregullt.
Komisari i policisë Artan Cuku u vra në atentat më 8 prill 2017 në hyrjen e pallatit ku banonte në kryeqytet.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
