Gazeta Si - Një 42-vjeçar është arrestuar mbrëmjen e të martës në Vlorë, pasi nuk iu bind urdhrit të policisë për të ndaluar, teksa po lëvizte me një mjet pa targa dhe i maskuar.
Ngjarja ka ndodhur pak pas mesnate, ku rreth orës 01:50 nga shërbimet e forcave "Shqiponja" u bë e mundur kapja në flagrancë e shtetasit Hasan Hasanaj, banues në Vlorë, lagjia "Partizani".
Policia thotë se ky shtetas lëvizte me automjetin e tij tip "Porsche" ngjyrë blu pa targa dhe nuk iu bind urdhrit për të ndaluar por u largua me shpejtësi në brendësi të lagjes “Isa Boletini”.
Pas ndjekjes për rreth 15 minuta ai u arrestua dhe rezultoi se ishte nën efektin e pijeve alkoolike.
Në momentin e prangosjes ky shtetas tha se ishte konfliktuar në një klub në qytetin e Vlorës dhe për këtë arsye ishte i maskuar dhe madje kishte hequr targat e mjetit.
Ndërkohë, burime nga policia e Vlorës bëjnë me dije se gjatë ndjekjes personi ka rrezikuar jetën e efektivëve të policisë duke tentuar të godasë me automjet.
Gjatë kontrollit të mjetit u gjet një maskë, 1 mjet prerës thikë dhe targat e automjetit. Gjatë testit të kryer për alkool ai rezultoi të ishte i dehur.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.