.png)
Gazeta Si - Roman Abramoviç do të marrë zyrtarisht shumë shpejt ofertën e parë për Çelsin. Ai konfirmoi publikisht se e ka nxjerrë në shitje klubin londinez, kampion në fuqi i Europës, dhe se të ardhurat do të shkojnë në ndihmë të familjeve të goditura nga lufta në Ukrainë.
Sipas tabloidit “Sun”, një konsorcium amerikano-zviceran, i përbërë nga Todd Boehly dhe Hansjorg Wyss, ka intensifikuar tratativat. Abramoviç, që synon ta shesë klubin edhe për shkak të frikës nga sanksionet, duke qenë se njihet si njeri i afërt i Putinit, kërkon rreth 3.3 miliardë euro. Një shifër, që nga specialistët e fushës, konsiderohet e vështirë për t’u arritur.
Blerësit e parë të mundshëm, - Boehly ka kuota të skuadrës së bejsbollit LA Dodgers, ndërsa Wyss është një milioner zviceran që operon në sektorin mjekësor dhe shëndetësor, - duket se nuk i afrohen kësaj shifre, duke ofruar 2.3 miliardë euro. Abramoviç ka autorizuar bankierët amerikanë të “Raine Group” të gjejnë blerës brenda 15 marsit.
Kjo konfirmon nxitimin e oligarkut rus për të mbyllur sa më parë shitjen. Interes ka edhe nga dy grupe të tjera, përveç Jim Ratcliffe, njeriut më të pasur në Britaninë e Madhe, me një pasuri që i kalon 7 miliardë euro.
Premier Liga ka garantuar tifozët e Çelsit se skuadra mund ta vazhdojë sezonin, të paktën për javët e ardhshme, pavarësisht nga sanksionet e mundshme ndaj Abramoviçit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
