Ndeshja kryesore e javës së dytë në Premier League mes Mançester Sitit dhe Totenhemit pati gjithçka brenda saj: 4 gola, spektakël, VAR dhe…sherr. Sterling shënoi golin e parë, por shumë shpejt u përgjigj Lamela, Aguerro kaloi sërish Mançester Sitin në avantazh, ndërsa Lukas Moura barazoi shifrat në 2-2. Në fundin e ndeshjes, në kohën shtesë, “qytetarëve” iu anulua goli i fitores nga VAR-i, që po i bëhet makth skuadrës së Guardiolës, ashtu si në Champions League pak muaj më parë. Goli i Gabriel Jesus u anulua për një prekje të topit më dorë nga mbrojtësi Laporte, para se braziliani të shënonte. Me atë që u pa në fushë, Mançester Siti meritonte fitoren, pasi luajti më mirë se Totenhemi, që pati shumë fat.
Ishte ndalesa e parë për Mançester Sitin, që ka 4 pikë pas 2 javësh. Gjatë ndeshjes pati edhe nervozizëm. Në momentin e zëvendësimit, sulmuesi argjentinas Serxhio Aguerro reagoi ndaj trajnerit Guardiola dhe të dy patën një zënkë për disa momente. Një episod që sigurisht nuk u shpëtoi telekamerave dhe aparateve të fotografëve. Trajneri spanjoll u përpoq ta zbuste lojtarin, duke bërë paqe në momentin final, por se sa e ka pranuar atë futbollisti argjentinas, nuk është ende e qartë. Mançester Siti ka një organikë shumë të pasur lojtarësh dhe për trajnerin Guardiola është e vështirë ta menaxhojë.
Në krye të klasifikimit në Premier League janë Liverpuli dhe Arsenali, të dy me nga dy fitore. Skuadra e trajnerit Jurgen Klop fitoi të shtunën në fushën e Southemptonit, 1-2, me gola të Manè dhe Firmino, ndërsa Ings shkurtoi diferencën për vendësit. Arsenali fitoi 2-1 në shtëpi ndaj Bërnleit. Sulmuesit Lakazet dhe Aubamejang realizuan për “Topçinjtë”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.