Gazeta Si - Tirana nuk fal. Në derbin me Dinamon, i zhvendosur në “Elbasan Arena”, pasi në kryeqytet nuk ka stadium të disponueshëm aktualisht, kryesuesit e tabelës kanë regjistruar fitoren e radhës, 1-0, që i shkëput 13 pikë nga vendi i dytë dhe titulli është gjithmonë e më i sigurt.
Goli i vetëm ndeshjes u shënua nga Devid 20 minuta para fundit, por derbi pati shumë episode. Ibraimi, kapiteni i Dinamos, goditi shtyllën, ndërsa në minutat e fundit humbi një penallti, që u prit nga portieri Bekaj. Ishte një penallti e akorduar me VAR për prekje të topit me dorë nga një mbrojtës i Tiranës.
Ishte po VAR-i që anuloi një gol të Dinamos në pjesën e parë, sepse topi ishte prekur me dorë nga lojtari që shënoi, Ali Samake. Dinamo mbetet e zhytur në fundin e tabelës, me shanse më të pakta mbijetese tashmë, pasi rivalët e saj sot kanë fituar dhe janë shkëputur me pikë.
Tirana vendos njërën dorë te titulli, mjafton të administrojë diferencën e madhe të pikëve që ka, madje mund t’ia lejojë vetes edhe ndonjë humbje. Java e 26-të e Superiores mbyllet të dielën me dy ndeshjet Laçi-Teuta dhe Skënderbeu-Kukësi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.