Në javën e parë të kampionatit francez, PSG-ja fitoi 3-0 ndaj Nimes, me gola të Kavanit, Mbapesë dhe Di Marias, por tifozët e ekipit parisien janë marrë më shumë me Nejmarin, edhe pse ai nuk luante. Ata e kanë sulmuar hapur, duke u nisur nga fjalët e fundit se sulmuesi brazilian po bën gjithçka për t’u kthyer në Spanjë. Ka një “luftë” të hapur tashmë mes brazilianit dhe tifozëve të PSG-së, pasi drejtuesit e këtij klubi kanë qenë në dijeni të situatës së lojtarit që në maj.
Shkëndija e parë e “luftës” ishte zgjedhja e "remuntadës" së famshme të Barcelonës në 2017-ën ndaj PSG-së në Champions si kujtimi më i bukur sportiv i Nejmarit. Në ndeshjen e fundit, sulmet e tifozëve ndaj brazilianit ishin nga të gjitha krahët. “Largohu, bir ku***!” - shkruhej në një parullë të shpalosur në shkallët e “Parc des Princes”. Tifozët nuk i kanë kursyer ofendimet ndaj brazilianit, i lënë jashtë skuadre për arsye merkatoje. Madje, në një moment ka pasur edhe një kor kundër tij me të njëjtat fjalë në gjuhën spanjolle për të evituar pasojat.
Goli i parë i ndeshjes u shënua me penallti nga Kavani, të cilit kohë më parë Nejmar ia kishte marrë të drejtën për të gjuajtur nga pika e bardhë, duke i hequr një rekord absolut uruguaianit. Tifozët që atëherë ishin të ndarë për brazilianin, ndërsa tani janë të gjithë kundër. Ata i kanë kujtuar Najmarit edhe skandalin seksual, ku ai akuzohej për përdhunim nga një vajzë. Sulmuesi brazilian është i padëshiruar në Paris dhe presidenti Al Khelaifi është i detyruar ta shesë te Barcelona ose Reali.
Pas episodeve të fundit ka reaguar me një postim në Tuiter motra e Nejmarit, Rafaela, e cila u është kundërpërgjigjur tifozëve të PSG-së me këto fjalë: “Sa qenie njerëzore të shpifura që jeni. Nuk do të fitoni asgjë pa të në skuadër!”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.