.png)
Me një goditje bilardoje fituese të sulmuesit Olivier Zhiru, Milani ka fituar 0-1 kryendeshjen e javës së 28-të të Serisë A në “Diego Armando Maradona” dhe ka rimarrë kryesimin e renditjes, me 60 pikë, 2 pikë para Interit dhe 3 para Napolit.
Skuadra e Spaletit e nisi më mirë ndeshjen, por pa mundur ta vinte në rrezik serioz portierin Maignan. Momenti vendimtar i ndeshjes ishte ai i fillimit të pjesës së dytë, kur sulmuesi francez i Milanit devijoi saktë topin, pas një goditjeje të Kalabrias. Napoli iu afrua shumë barazimit në fund me Ounas dhe Osimhen, por nuk pati fat.
Një fitore shumë e rëndësishme kjo për Milanin, që përveçse i jep kreun e renditjes, zeron edhe llogaritë e ndeshjeve direkt me Napolin. Nuk ishte një 90-minutësh spektakolar, por shumë i ekuilibruar, një luftë nervash që e fituan kuqezinjtë e Piolit. Milani bëri një lojë shumë të mirë në mbrojtje, ndërsa Leao ishte një shqetësim i vazhdueshëm për kundërshtarin.
Juventusi ka mundur sot Specian e Rei Manajt me një gol të Moratës dhe ka konsoliduar pozitat në zonën Champions, pse jo dhe për titullin kampion. Diferenca prej 7 pikësh me kreun nuk është e paarritshme. Interi fitoi me goleadë 5-0 të premten ndaj Salernitanës, ndërsa Roma e Kumbullës mundi 1-0 Atalantën e Gjimshitit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
