.png)
Gazeta Si - Futbollistët e Kombëtares janë gjithmonë protagonistë me klubet e tyre. Shumica luajnë rregullisht në kampionatet më të forta të Europës, ndërsa fati rezervon për ta përjetime të ndryshme. Këtë fundjavë kuqezinjtë thuajse i kanë provuar të gjithë: gola, autogola, kartonë të kuq, pritje spektakolare dhe stol.
Golat kuqezi këtë herë vijnë nga Austria, ku sulmuesi Xhakomo Vrioni rezultoi vendimtar për Tirolin me 2 gola të rëndësishëm. Sulmuesi në pronësi të Juventusit, i huazuar te Tiroli, shënoi golat e përmbysjes ndaj Riedit nga 2-1 në 2-3. Vrioni realizoi golin e barazimit në minutën e 82-të dhe në shtesë atë të fitores. Ishte një fitore me shumë vlera për skuadrën e sulmuesit shtatlartë, pasi e largon atë nga zona e rënies nga kategoria. 12 gola për Vrionin me Tirolin këtë sezon.
Le doublé express de Giacomo Vrioni
— Football Albanais (@FutbolliShqipFR) April 16, 2022
pic.twitter.com/4n7HejymCC
Armando Broja luajti titullar ndaj Arsenalit në kampionat, por edhe këtë herë ai nuk mundi ta gjente rrugën e rrjetës. Një moment jo i mirë për sulmuesin e Kombëtares. Ai u zëvendësua në pjesën e dytë dhe sipas shtypit sportiv britanik, ishte ndër më të dobëtit për Sauthemptonin.
Një fundjavë për t’u harruar ishte edhe për mbrojtësin Ivan Balliu, i cili u ndëshkua me karton të kuq në ndeshjen ndaj Alaveshit, ku Rajo Valekano humbi 1-0. Në një dyluftim afër vijës fundore, Balliu shkeli kundërshtarin dhe arbitri e konsideroi si një veprim të qëllimshëm të mbrojtësit kuqezi, duke i dhënë ndëshkimin maksimal.
Në Itali këtë fundjavë kishim një derbi portierësh, Strakosha përballë Berishës. Të dy pësuan nga një gol në sfidën Lacio-Torino, që u mbyll në barazim 1-1. Që të dy janë vlerësuar me notën 6 për paraqitjen, por duhet theksuar se Berisha ka bërë një pritje spektakolare ndaj Milinkoviç Saviç. Në këtë ndeshje mungoi Hysaj, në stol gjithë kohën, kurse Vojvoda luajti 90 minuta për Torinon.
Fati i keq ka përndjekur mbrojtësin Adrian Ismajli, titullar për Empolin ndaj Udinezes, bashkë me Asllanin dhe Bajramin. Ismajli shkaktoi një autogol në humbjen 4-1 të Empolit, ku në tentativë për të larguar një top të krosuar nga e djathta, ai bëri devijimin e gabuar, duke e dërguar në rrjetën e tij. Më pas Ismajli u ndëshkua me karton të verdhë. Ai dhe Asllani qëndruan 90 minuta në fushë, kurse Bajrami u ndërrua pas 70 minutash.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
