Southemptoni ka gjetur fitoren e munguar në kampionat dhe protagonist ka qenë pa dyshim edhe sulmuesi i Kombëtares, Armando Broja. Ai nuk shënoi në fitoren 2-3 ndaj Uest Hemit, por me atë që ka dhënë në fushë, është shpallur lojtari i ndeshjes.
Broja ka bërë gjithçka mirë deri në minutën e 81-të, kur u zëvendësua nga Adams. Teksa po linte fushën, ai u duartrokit nga tifozët e Southemptonit, të cilët u ngritën në këmbë. Sulmuesi kuqezi ishte i papërmbajtshëm në depërtime dhe në një të tillë arriti të fitonte një penallti, që u akordua pas konsultimit me VAR-in. Ishte penalltia që solli golin e dytë për Southemptonin.
Duhet theksuar se Broja ka vuajtur në këtë ndeshje jo pak ndërhyrjet e rënda të lojtarëve kundërshtarë, të cilët nuk e kanë kursyer aspak me shkelma. Futbollisti shqiptar ishte ai që fitoi më shumë faulle për skuadrën e tij, ndërkohë që u ndëshkua edhe me karton të verdhë. Sulmuesi është vlerësuar me notën 8.5 për paraqitjen e tij.
“Broja ka cilësi dhe po luan gjithmonë e më mirë. Jam i lumtur që fitoi një penallti në atë rast, ku mund të kishte shënuar”, - tha pas ndeshjes trajneri i Southemptonit, Hasenhutl.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.