Armando Broja ishte protagonist në ndeshjen mes Southemptonit dhe Mançester Sitit, që përfundoi në barazim, 1-1. Sulmuesi i Kombëtares shqiptare këtë herë ka qenë pa fat për të gjetur rrugën e rrjetës.
Broja shënoi në fakt në minutën e 23-të, por goli u anulua për pozicion jashtë loje dhe pamjet më pas treguan se anësori kishte të drejtë. Më pas lojtari i Kombëtares ishte protagonist i një episodi tjetër. Ai u rrëzua në zonë pas një kontakti me portierin Ederson dhe dukej penallti e sigurt, por edhe këtë radhë pati një sinjalizim për pozicion jashtë loje.
Edhe më pa fat ishte lojtari i Kombëtares kuqezi në pjesën e dytë, teksa në zhvillimet e një goditjeje këndi goditi me kokë drejt portës dhe topi u ndal në shtyllë. Broja bëri shumë për skuadrën dhe e ndihmoi atë me volumin e lojës, pavarësisht se nuk shënoi.
Southemptoni ia doli të marrë pikë ndaj kampionëve në fuqi të Premier Ligës. Pas 22 javësh kampionat, skuadra e Brojës ka 25 pikë në tabelën e klasifikimit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.