.png)
Gazeta Si - Gjyqtarja e Tiranës, Shefkie Demiraj është shkarkuar këtë të mërkurë nga komisioni i Vettingut.
KPK e shkarkoi gjyqtaren, pasi ajo nuk e justifikoi pasurinë e saj.
Komisioni i Vettingut ka konstatuar se gjyqtarja nuk justifikon plotësisht me burime të ligjshme të ardhurash një shtëpi tre kate + papafingo në Tiranë ndërtuar gjatë periudhës 1998-2012, me sipërfaqe rreth 461 m2 dhe me vlerë të deklaruar 20 milionë lekë.
Komisioni konstatoi gjithashtu edhe pamundësi financiare për blerjen e një automjeti tip “Benz” në vitin 2014, kundrejt çmimit 950 mijë lekë.
Gjatë seancës dëgjimore që zgjati për rreth pesë orë dy ditë më parë, gjyqtarja dha shpjegime për barrën e provës për pasurinë dhe gjetjet në kriterin profesional. Ndërkohë, Demiraj u vlerësua pozitivisht për pastërtinë e figurës.
Demiraj është dhe një nga gjyqtaret që ka marrë pjesë në procesin gjyqësor në dosjen e Gërdecit, së bashku me Fatmira Hajdarin dhe Ridvan Hadon.
Shkarkimi nga detyra si gjyqtare nga Vettingu, ka krijuar trishtim për Shfekie Demirajn, por edhe për familjarët e saj, të cilët e kanë shoqëruar në seancë. Pas vendimit për shkarkim, shihet djali i saj, i cili i hedh dorën mbi supe mamasë së tij për ta ngushëlluar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
