Politike

Vetëvendosje nis nënshkrimin e peticionit: Zgjedhje të reja

Lëvizja Vetëvendosje nisi nënshkrimin e peticionit për të kërkuar zgjedhje të reja parlamentare në Kosovë.

“Kosova ka nevojë për zgjedhje të reja sepse vetëm përmes tyre mund të ketë legjitimitet qeverisja e re. Për të dalë nga kjo krizë, si hap të parë po mbledhim nënshkrimet për peticionin që ka vetëm këtë kërkesë: zgjedhje të reja. Jo qeveri pa zgjedhje e për vjedhje. Jo qeveri për ndarje e copëtim. Por zgjedhje, demokraci e zhvillim”, thuhet në njoftimin e VV-së.

Partia e Albin Kurtit thotë se që të zgjidhet kriza politike dhe të përcaktohet rruga që do të marrë vendi: drejt ndryshimit dhe çlirimit prej korrupsionit, apo drejt rikthimit të të korruptuarve, Kosova ka nevojë për zgjedhje.

“Me këtë peticion ne, qytetarët e Kosovës, duke vendosur nënshkrimin dhe numrin e letërnjoftimit, bëjmë të ditur se duam zgjedhje, e se vetëm qeveria e dalë nga zgjedhjet ka legjitimitet për të qeverisur. Veprimet në Kuvendin e Kosovës në 25 mars 2020 treguan se partitë e vjetra, PDK, LDK, AAK, Nisma dhe Lista Serbe, janë bërë bashkë kundër votës së qytetarëve. Ata nuk mundën ta durojnë një shtet të drejtë, që i largon të korruptuarit dhe nuk merr rroga të larta për vete, por i çon paratë në ndihmë të popullit, të ekonomisë e shëndetësisë. Ndërsa vendimi i Gjykatës Kushtetuese në 28 maj 2020, tregon se sa i kapur prej partive të vjetra është shteti e drejtësia. Aty ku kriminelët janë mbi gjykatat, të vetmit që ndëshkohen janë qytetarët”, thotë Vetëvendosje, ndërsa pritet të mësohet seanca e Parlamentit të Kosovës, kur do të votohet qeveria e re me kryeministër Avdulla Hoti, pasi Gjykata Kushtetuese i dha të drejtë Presidentit.

Më Shumë