Autori i dyshuar i vrasjes së 18-vjeçares shqiptare në Mal të Zi, Shejla Bakija, është vetëdorëzuar mbrëmjen e së dielës në polici. Lajmi bëhet i ditur nga shtypi malazez, i cili thekson se 28-vjeçari Ilir Dokaj, u vetëdorëzua pas negociatave.
Krimi i rëndë ndodhi më 30 shtator, kur Ilir Dokaj vrau me armë gruan e tij shqiptare në Tuz të Malit të Zi, Shejla Bakija dhe plagosi babanë e saj, Shaban Bakija 42 vjeç në shtëpinë e këtyre të fundit. Më 26 gusht, viktima e kishte kallëzuar në polici Dokajn për kërcënim. Ndëshkimi i tij ishte mbyllur me një gjobë.
Sipas mediave lokale, Ilir Dokaj kishte kërcënuar shqiptaren dhe familjen e saj duke i thënë: “Do të derdhet gjak për këtë çështje, jeta juaj është në duart e mia”.
E megjithatë, prokurori vlerësoi se nuk kishte elementë të veprës penale dhe i riu u dënua vetëm me gjobë. Ndërkohë, pas ngjarjes së rëndë, Prokuroria ka nisur hetimet për të shqyrtuar veprimet e prokurorit.
Të dielën, dhjetëra aktiviste të të drejtave të njeriut, kanë protestuar, duke kërkuar ndëshkim të autorit dhe drejtësi për 18-vjeçaren e vrarë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.