Nga Gazeta ‘SI’ - Inflacioni në dhjetor 2023 u rrit përsëri duke u rikthyer në shifrën e 4%. Krahasuar me muajin paraardhës, rritja është udhëhequr nga grupi i ushqimeve dhe pijeve joalkoolike, 1.1%, pijet alkoolike dhe duhani me 1% dhe hotele/restorante me 0.2%.
Nga dhjetori i 2022-shit, inflacioni raportohet në rënie (7.4%) por kjo vetëm nga ulja e fortë e çmimeve të naftës që zënë dhe një peshë të konsiderueshme në këtë tregues. Grupet e tjera kanë vijuar shtrenjtimin, me ushqimet dhe pijet 6.7%, argëtimi dhe kultura 5.4%, qira, energji, ujë me 2.6% etj.
Shifrat e rritjes janë të frikshme të ndara sipas nëngrupeve ushqimore. Zarzavatet dhe patatet ju shitën pothuajse 21% më shtrenjtë se një vit më parë, frutat 10% më shtrenjtë dhe grupi i “qumësht, djathë dhe vezë” me 6.7% më shtrenjtë.
Ndonëse për muaj me radhë gjatë 2023-shit inflacioni në Shqipëri u raportua me ulje, çmimet e produkteve, përveç naftës, vetëm janë shtrenjtuar. Spiralja që nisi dhe u justifikua me luftën në Ukrainë, nuk ka të ndalur as dy vite më vonë. Rritja mesatare vjetore e çmimeve në vitin 2023 është 4,8% nga 6,7% që ishte në vitin 2022.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.