.png)
Një nga personat e dyshuar si bashkëpunëtor në vrasjen e Endri Mustafës, duket se do të gjykohet vetëm për sasinë e drogës të sekuestruar pas kontrollit në një magazinë pranë banesës së tij.
Gjykata e Shkodrës ka dhënë masën e sigurisë “arrest në burg” për Edison Arrazin për 280 gramë kanabis që dyshohet se i përket atij.
Mësohet se 26-vjeçari nuk është pyetur fare nga gjykata për vrasjen e Endri Mustafës. Ndërkohë që në njoftimin e policisë pak ditë më parë, Arrazi ishte prangosur si person që dyshohet se kishte dijeni për ngjarjen.
Lidhur me këtë, ka reaguar edhe vëllai i të arrestuarit, duke hedhur poshtë si akuzën për përfshirjen në vrasjen e Endri Mustafës, por edhe atë të posedimit të drogës.
"Droga është gjetur në një magazinë larg shtëpisë tonë. Vëllai im nuk ka lidhje fare me vrasjen dhe këtë e vërteton policia e shtetit që e dyshon vetëm për drogë. Vëllai në momentin e vrasjes ka qenë në shtëpi duke fjetur gjumë", - tha ai jashtë dyerve të gjykatës.
Për vrasjen e Mustafës në zonën e Livadheve në Shkodër, aktualisht është në burg 15-vjeçari me iniciale E.M., i cili është arrestuar si bashkëpunëtor i vrasësve dhe që dyshohet si personi që ka nxjerrë viktimën nga shtëpia.
Endri Mustafa u gjet i vdekur me 6 plumba në trup më 17 maj, në zonë e Livadheve të Shkodrës. Si autor të dyshuar të ngjarjes policia ka shpallur në kërkim Ibrahim Liçin, ndërsa është arrestuar 15-vjeçari E.M., i akuzuar si bashkëpunëtor i tij.
Një ditë pas vrasjes, bashkëshortja e viktimës, ka mohuar që vrasja e të shoqit të jetë bërë nga fisi i Liçajve dhe Bajrave, të cilët janë në konflikt disa vjeçar mes tyre.
Ndërkohë, edhe Mustafa Liçi, babai i 28-vjeçarit Ibrahim Liçi, tha se autori i ngjarjes nuk është djali i tij, duke folur për një skemë të ngritur nga policia.
Sipas tij, janë Bajrajt dhe Astmer Bilali, ata që kanë përdorur 15-vjeçarin me qëllim që të thotë se krimin e ka kryer në bashkëpunim me Ibrahim Liçin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
