Trump ‘mbërrin’ në Ballkan, i kërkon Rumanisë zbutjen e akuzave ndaj vëllezërve Tate

Gazeta Si – Donald Trump i ka dalë në krah kampionit mizogjen, influencuesit famëkeq Andrew Tate: administrata amerikane, sipas “Financial Times”, ka ndërhyrë te autoritetetet rumune për t’i rikthyer lirinë e lëvizjes Tate-s dhe vëllait të tij Tristan, të cilët u arrestuan fillimisht në Bukuresht në vitin 2022 dhe të akuzuar për krime seksuale dhe pastrim parash.

Dyshja në fakt janë liruar nga “arresti shtëpiak” kohët e fundit, por nuk lejohen të largohen nga vendi. “Financial Times” raporton se i dërguari për misione të posaçme i Trump, Richard Grenell, u takua personalisht me ministrin e Jashtëm të Rumanisë.

Qeveria e Londrës po kërkon gjithashtu ekstradimin e vëllezërve Tate për t’i gjykuar për përdhunim dhe trafik të qenive njerëzore.

Përtej çështjes ligjore – tashmë shqetësuese në vetvete – figura e Andrew Tate hedh dritë mbi botën e keqe të të ashtuquajturës “manosferë”, universi online i frekuentuar nga miliona e miliona meshkuj të rinj që shkëmbejnë pikëpamje anti-feministe në kufi me nxitjen e urrejtjes dhe dhunës.

Për këtë audiencë, Tate është një frymëzim dhe një figurë referuese: ai vetë e përkufizon veten si seksist dhe mizogjen, ai pretendon se gratë duhet të qëndrojnë në shtëpi dhe se ato i përkasin burrave, si dhe nevojën për të pasur marrëdhënie seksuale me vajzat adoleshente për t’u dhënë atyre një mundësi “përgatitjeje”.

Tate u ndalua nga Facebook, Instagram dhe TikTok dhe llogaria e tij u pezullua gjithashtu nga Twitter, përpara se Elon Musk, pasi bleu platformën, ta riaktivizonte atë: sot ndikuesi ka pothuajse 7 milionë ndjekës në “X”.

Një ish-kampion i kikboksit, me origjinë amerikane, por i rritur në Angli, Tate kishte marrë pjesë gjithashtu në Big Brother në Angli në vitin 2016, për t’u hequr pasi u akuzya për përdhunim.

Në vitin 2017, ai dhe vëllai i tij u transferuan në Rumani, duke përmendur mundësinë e një lirie më të madhe veprimi.

Por është në internet që Tate ka gjetur hapësirë, falë opinioneve dhe videove të tij ekstreme, në të cilat ai shfaq një stil jetese luksoz të makinave të shpejta, jahteve dhe avionëve privatë, gjë që e ka bërë atë një idhull të adoleshentëve.

Mirëpo, figura e tij tërhoqi vëmendjen edhe të pedagogëve dhe qeverive, aq sa në Londër u interesua edhe departamenti i antiterrorizmit për të, për shkak të rolit të mundshëm që ai luajti në radikalizimin e të rinjve.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.