Gazeta Si – Java e 3-të e Superiores nis sot me ‘Klasiken’ e Shqipërisë, me sfidën Tirana-Vllaznia. Ndeshja do të zhvillohet në stadiumin ‘Selman Stërmasi’, në orën 16:00.
Është përballja e parë mes dy skuadrave pretendente për titull për këtë kampionat. Tirana vjen pas një fitoreje dhe një barazimi në dy javët e para, kurse Vllaznia pas fitores me Kukësin dhe humbjes ndaj Erzenit.
Edhe pse është ende herët, kjo ndeshje do të tregojë deri diku se çfarë mund të bëjnë këto dy skuadra këtë sezon. Tirana është fuqizuar në mbrojtje ditën e fundit të merkatos, duke afruar Bruno Lulajn. Largimet e shumta ndikojnë, por bardheblutë janë të vendosur të mbrojnë kurorën.
Shkodranët janë çliruar psikologjikisht nga fitorja në sekondën e fundit ndaj Kukësit disa ditë më parë. Skuadra e Josës pritet të shprehet më mirë sot në fushë. Mungesa e madhe për Vllazninë është ajo e Liridon Latifit për shkak dëmtimi.
Java e 3-të vazhdon të shtunën dhe të dielën me ndeshjet Erzeni-Teuta, Kukësi-Kastrioti, Bylis-Partizani dhe Laçi-Egnatia.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.