.png)
Tirana e këtij sezoni të ri pritet të jetë ndryshe nga ajo që pamë vitin e fundit. Shumë shpenzime dhe një projekt i ri me në krye Ardian Memën kanë bërë që bradheblutë të kuotohen në mesin e ekipeve pretendente për kreun.
Se sa do ia arrijë këtij qëllimi kampionati do e tregojë, pasi merkato e mirë është vetëm gjysma e punës. Por në këtë linjë të nisjes së një projekti të ri, Tirana ka bërë një hap të rëndësishëm edhe në sektorin e të rinjve. Klubi bardheblu ka bërë me dije se ka afruar si trajnerë të moshave, U-17 dhe U-19, Julian Ahmatajn dhe Bledar Devollin.
Të dy trajnerët kishin ekipe në Superligë vitin e fundit, njëri Luftëtarin dhe tjetri Kastriotin dhe pritet të jenë një vlerë e shtuar për sektorin e të rinjve të Tiranës.
“Julian Ahmataj është zyrtarisht pjesë e KF Tiranës në rolin e Scoutit dhe atë të trajnerit të ekipit U-17. Klubi ka zgjedhur të investoje këtë sezon jo vetëm në përforcimin e skuadrës me emra të rëndësishëm, por dhe në strukturë me afrimin e dy trajnerëve të afirmuar që më parë kanë qenë dhe pjesë e Tiranës.
Bledar Devolli do të marrë drejtimin e Tiranës U19, Ahmataj drejtimin e Tiranës U17. Akademia këtë vit do të jetë një nga prioritetet e klubit ku do të investohet shumë në infrastrukturë dhe burime njerëzore. Hedhim poshtë kështu, të gjithë spekulimet në lidhje me zhvillimet e fundit në klubin bardheblu”, shkruhej në njoftimin e klubit kryeqytetas.
Ky zhvillim te Tirana flet për një erë te re të 26 herë kampionët e vendit, të cilët duan të besojnë te talentet vendas. Eshtë një hap pozitiv dhe për tu vlerësuar edhe pse një talent si Ernest Muçi që Tirana e ka gati që prej dy sezonesh, deri më tani nuk ka ditur ta shfrytëzojë siç duhet.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
