.png)
Tirana e javës së parë të kampionatit ishte një ekip që i kënaqi të gjithë. Tifozët e shumtë bardheblu, presidentin Halili që shpenzoi pa fund këtë merkato, trajnerin Ardian Mema dhe sigurisht të gjithë dashamirësit e futbollit shqiptar, pasi të shohësh Tiranën në nivelet më të larta është gjithmonë kënaqësi.
3-0 me Luftëtari ishte një fitore e bujshme, por nuk ka shumë kohë për festë, pasi në derë është ndeshja e dytë e kampionatit. Këtë herë në “Selman Stërmasi” bardheblutë i pret një sfidë shumë herë më e vështirë se ajo me gjirokastritët të shtunën. Në Tiranë vjen Teuta e Bledi Shkëmbit, i cili këtë vit ka krijuar një grup kompakt, duke eliminuar shpenzimet e mëdha dhe është fokusuar të talentet durrsakë, të ndërlidhur me disa futbollistë me eksperiencë në Superligë.
Ndeshja e sotme e orës 19:00 përveçse e para për javën e dytë të Superiores, parashihet edhe si kryesorja, pasi si Tirana ashtu edhe Teuta me lëvizjet në merkato kuotohen në mesin e ekipeve që do të duelojnë për vendet e para të renditjes. Për të dyja skuadrat pritet të ketë ndryshime në formacionin titullar nga ndeshja e parë.
Në daljen e tij për mediet, numri një i stolit bardheblu, Ardian Mema tha se përballja me Teutën vjen në momentin e duhur për të matur forcat me një kundërshtar që ka të njëjtat objektiva. Por edhe Bledi Shkëmbi nuk mbetet pas me deklaratat, teksa u shpreh i bindur se ekipi i tij është gati për të marrë fitoren e dytë në kampionat, pas asaj me Bylisin në shtëpi.
Ndeshja Tirana – Teuta, pas rezultatit pozitiv që bardheblutë morën javën e parë, pritet që të ndiqet nga një numër i madh tifozësh kryeqytetas, që këtë vit janë ndarë edhe në dy tifo grupe. Pas “Tirona Fanatics”, grupi më i vjetër i tifozëve të Tiranës, këtë sezon është krijuar edhe “Capital Crew”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
