.png)
Gazeta Si – Djali i dy herë kampionit olimpik Virgilijus, lituanezi Mikolas Alekna, ka thyer në Oklahoma rekordin e vendosur nga gjermani Shult në 1986-ën.
Ai i Jurgen Shult ishte rekordi botëror më jetëgjatë te meshkujt. Sportisti i Gjermanisë Lindore, më 6 qershor 1986, në Neubrandenburg (Gjermani), e kishte hedhur diskun 74.08 metra. Një hedhje e famshme, që jo më kot askush nuk arrinte të kalonte. Ai rekord, më në fund ka rënë. E ka thyer lituanezi Mikolas Alekna.
Babai i tij, Virgilijus Alekna, është shpallur dy herë kampion olimpik në hedhjen e diskut (2000 dhe 2004). Mikolas në Oklahoma e ka hedhur diskun 74.35 metra herën e 5-të. Të gjitha tentativat e tij i kanë kaluar 70 metrat dhe kjo ka bërë përshtypje.
Në fundjavë, kur sportistët e kësaj disipline po shijonin kushtet perfekte, Alekna tregoi një formë shumë të mirë, duke përmirësuar hedhjen e tij më të mirë prej 71.39 metrash, që e kishte renditur në vend të 10 në botë.
Alekna ka fituar në karrierë 2 medalje botërore, argjendi në Eugene (SHBA) në 2022-shin dhe bronzi në Budapest verën e kaluar. Ai është një nga favoritët për podin olimpik në Olimpiadën e Parisit. Familja Alekna tani ka 2 nga 3 hedhësit më të mirë të diskut në histori, babai Virgilijus dhe djali Mikolas.
Rekordi botëror më jetëgjatë i të gjitha kohërave në atletikë mbetet ai i 800 metrave për femra, i vendosur nga Jarmila Kratoçvilova në 1983-shin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
