Pas lëkundjeve të forta të tërmeteve që goditën pasditen e së shtunës Shqipërinë, duke sjellë lëndime në njerëz dhe dëme të shumta materiale dhe panik te qytetarët vjen edhe reagimi nga Komisioneri për Negociatat e Zgjerimit, Johannes Hahn.
Hahn me anë të një postimi në “Twitter”, shprehet se ndihet i shqetësuar dhe i trishtuar nga lëkundjet shkatërrimtare të tërmeteve që prekën Shqipërinë.
“I trishtuar dhe i shqetësuar kur mësova në lidhje me serinë e tërmeteve shkatërrimtare në Shqipëri, të cilët shkaktuan lëndimin e qindrave njerëzve dhe dëme serioze në infrastrukturë. Bashkimi Europian ofroi ndihmë menjëherë”, shkruan Hahn në një postim në Twitter.
Ndërkohë, kryeministri Edi Rama kërkoi sot nga të gjithë prefektët që të regjistrojnë çdo dëm dhe të flasin me çdo familje të dëmtuar nga tërmeti i së shtunës. Në mbledhjen e sotme me prefektët në Ministrinë e Mbrojtjes, kreu i qeverisë tha se të gjithë prefektët do të spostohen në Durrës për të nisur menjëherë komunikimin me qytetarët. Menjëherë më pas, kreu i qeverisë mblodhi edhe Grupin Parlamentar të PS-së ku tha se të gjithë deputetët, ministrat dhe kryebashkiakët do të ndahen në të gjitha zonat e prekura nga tërmetet, për të zhvilluar komunikime me qytetarët, të cilët vijojnë të jenë të traumatizuar nga lëkundjet e forta të tërmeteve.
Tërmeti i fuqishëm i ditës së djeshme la pas 105 persona të lënduar, dhjetë prej të cilëve në gjendje më të rëndë. Tërmeti shkaktoi dëme të mëdha kryesisht në Durrës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.