Të rinjtë me probleme të shëndetit mendor janë në rrezik më të lartë për goditje në tru ose sulm në zemër

Të rriturit e rinj që kanë çrregullime të shëndetit mendor kanë më shumë gjasa të pësojnë një atak në zemër ose goditje në tru, sipas një studimi të ri historik.

Studimi i publikuar të hënën, i cili përfshiu 6.5 milionë njerëz dhe u botua në revistën e Shoqatës Europiane të Kardiologjisë, zbuloi se për të rriturit e moshës 20 dhe 30 vjeç, të paturit e një çrregullimi mendor mund të ketë deri në trefish rritje të rrezikut të një ataku në zemër ose goditje në tru.

Më shumë se 6.5 milionë njerëz iu nënshtruan pyetjeve shëndetësore kur ishin nga mosha 20 deri në 39 vjeç, midis viteve 2009 dhe 2021. Askush me histori sulmi në zemër ose goditje në tru nuk u përfshi në studim.

Studimi shqyrtoi lidhjen midis çrregullimeve të shëndetit mendor dhe rrezikut të zhvillimit të infarktit të miokardit (sulmit në zemër) dhe goditjes ishemike, lloji më i zakonshëm i goditjes që përfshin një mpiksje gjaku në tru.

Rreth 13 për qind e pjesëmarrësve në studim kishin të paktën një çrregullim mendor, dhe prej tyre gati gjysma kishin ankth.

Më shumë se një në pesë kishte depresion dhe një në pesë kishte pagjumësi. Të tjerët kishin një formë të çrregullimit bipolar, skizofreninë, çrregullimet e të ngrënit, çrregullimet e personalitetit dhe çrregullimin e stresit post-traumatik (PTSD).

Ata me ndonjë çrregullim mendor kishin 58 për qind gjasa më të larta për infarkt të miokardit dhe 42 për qind rrezik më të madh për goditje në tru, krahasuar me ata që nuk kishin probleme të shëndetit mendor.

“Problemet psikologjike ishin të zakonshme tek të rinjtë dhe kishin lidhje të forta me shëndetin kardiovaskular”, thotë autori i studimit, profesor Eue-Keun Choi.

“Gjetjet tregojnë se këta individë duhet të bëjnë kontrolle të rregullta shëndetësore dhe të marrin mjekim nëse duhet për të parandaluar infarktin dhe goditjen në tru.

“Ndërsa sjelljet e stilit të jetesës nuk shpjegonin rrezikun e tepërt kardiovaskular, kjo nuk do të thotë se zakonet më të shëndetshme nuk do të përmirësonin prognozën. Prandaj, modifikimi i stilit të jetesës duhet t'u rekomandohet të rinjve me çrregullime mendore për të rritur shëndetin e zemrës”.

Për njerëzit me PTSD, rreziku i sulmit në zemër ishte më shumë se tre herë më i lartë se për ata pa asnjë shqetësim.

Ishte 2.61 herë më i lartë për ata me skizofreni dhe 2.4 herë më i lartë për ata me çrregullim bipolar.

Rreziku i goditjes në tru ishte i rritur për të gjitha problemet e shëndetit mendor, përveç PTSD dhe çrregullimeve të të ngrënit, me çrregullimet e personalitetit dhe skizofreninë që përbëjnë rreth trefish rritje të rrezikut.

Depresioni dhe pagjumësia ishin të lidhura me rreziqe më të mëdha të sulmit në zemër dhe goditjes në tru tek gratë sesa tek burrat.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.