Nga Gazeta ‘Si’ - Opozita në Kosovë ka akuzuar sërish qeverinë Kurti se marrëdhëniet me SHBA-në nuk kanë qenë kurrë në nivel më të ulët se sot.
Pas takimit të djeshëm me të dërguarin e SHBA-së për Ballkanin Perëndimor Gabriel Escobar, liderët opozitarë u shprehën se kjo situatë është shqetësuese për ta.
Kryetari i Lidhjes Demokratike të Kosovës, Lumir Abdixhiku ndërsa ndau detaje nga takimi u shpreh se mungesa e bashkëpunimit me SHBA-në sjell pasoja për integrimin euroatlantik të Kosovës.
“Sa i përket takimit të mbrëmshëm, ishte një takim informues mbi relacionet bilaterale mes Kosovës dhe SHBA-së, për ta thënë më thjesht, në atë që na u tha qartë dhe zëshëm se nuk kanë qenë asnjëherë në nivel më të ulët sesa që janë sot.
Mungesa e bashkëpunimit të ngushtë me aleatët tanë kryesorë, me SHBA-në, sjell pasoja për integrimin euroatlantik të Kosovës dhe kjo gjendje është shqetësuese për ne. Tani Kurti përfaqëson Qeverinë e Kosovës dhe këto pasoja patjetër se barten edhe në fatin e Kosovës. Por është obligim i gjithë nesh të ruajmë dhe kultivojmë këto relacione se janë të domosdoshme, janë të pazëvendësueshme”, u shpreh ai.
Liderët e partive politike opozitare, PDK, LDK dhe AAK, u thirrën në një takim nga emisari special i SHBA-së për Ballkanin Perëndimor, Gabriel Escobar gjatë vizitës së tij në Prishtinë.
Sot pasdite ai pritet të takojë kryeministrin Albin Kurti.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.