Takimi i parë me ndërkombëtarët pas zgjedhjeve, Basha takon Shefen e Misionit të OSBE-ODIHR

Kreu i Partisë Demokratike Lulzim Basha zhvilloi një takim me shefen e misionit të OSBE-ODIHR, Ursula Gacek, në zyrën e tij në selinë blu.

Temë kryesore e takimit ishin zgjedhjet e 25 Prillit në një kohë kur PD-ja zyrtarisht ende nuk e ka thënë fjalën e saj, dhe në anën tjetër kemi një raport paraprak të OSBE-ODIHR që vlerëson zgjedhjet për rregullsinë e mbarëvajtjes, por ka kërkuar në të njëjtën kohë që akuzat për shit-blerje të votës të hetohen.

Lulzim Basha ka bërë vetëm një dalje publike qysh prej mbarimit të zgjedhjeve, duke lënë të hapur të gjitha obsionet dhe duke mos qartësuar asnjërën prej tyre se cfarë do të bëjë PD-ja në vijim.

E vetmja deklaratë që mbahet mend prej tij është se zgjedhjet ishin masakër elektorale

Deri më tani kemi vetëm deklarata të shkëputura nga kandidatë për deputetët të PD-së se zgjedhjet u vodhën, duke u kujdesuar më shumë që të komentojnë zërat kritike brenda partisë kundër Bashës sesa vijën politike që do të ndjekë PD.