.png)
Gazeta Si - Kampionati i Abissnet Superiores luan sot javën e fundit, të 36-tën. Ka edhe një vend të lirë që të çon në Europë dhe për të janë në garë tri skuadra. Të gjitha ndeshjet luhen në orën 17:00.
Tirana sot ka programuar festën e titullit, pas ndeshjes me Kukësin në “Selman Stërmasi”. Kundërshtari është ende në garë për të shkuar në Europë, por i duhet të marrë pikë në fushën e kampionëve të rinj në javën e fundit.
Tirana dhe Laçi e kanë të sigurt Europën. Partizani me 55 pikë, pothuajse të sigurt vendin e 3-të. Për vendin e 4-t gjithçka varet nga kombinimet e ndeshjeve të 3 skuadrave që luajnë për të.
Vllaznia, me 52 pikë, po aq sa Kukësi, ndeshet me Kastriotin në javën e fundit dhe shpreson të shkojë në Europë edhe nga kampionati. Shkodranët kanë një shans edhe nga Kupa e Shqipërisë, por duhet të fitojnë finale me Laçin.
Më të vështirë e ka Teuta, që sot luan në Korçë. Durrsakët kanë 49 pikë dhe duhet të fitojnë e të shpresojnë për humbjet e rivalëve.
Për rënien nga kategoria situata është e qartë. Skënderbeu dhe Dinamo kanë rënë matematikisht, kurse Egnatia do të luajë ndeshje shtesë me Korabin për të qëndruar mes më të mirëve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
