Studimi i ri: Vetëm një pije alkoolike në ditë mund të rrisë presionin e gjakut

Edhe një gotë e vetme pije alkoolike në ditë mund të rrisë presionin sistolik të gjakut si tek burrat ashtu dhe te gratë pa hipertension ekzistues. Në këtë përfundim ka arritur një studim i ri, sipas të cilit ndikimi negativ i alkoolit në presionin sistolik të gjakut vazhdon të rritet me kalimin e viteve.

“Ne nuk gjetëm efekte më pak të dëmshme tek ata që pinin një nivel të ulët alkooli në krahasim me ata që pinë alkool në sasi më të mëdha,” tha autori i studimit Dr. Marco Vinceti, një profesor i epidemiologjisë dhe shëndetit publik në Universitetin e Modenës dhe Reggio Emilia në një deklaratë.

Sasitë e vogla të alkoolit rrisin gjithashtu edhe presionin e ulët të gjakut, ose diastolik, por vetëm te meshkujt, sipas studimit, i cili u botua të hënën në revistën Hypertension.

“Të dy leximet sistolike dhe diastolike kontribuojnë në rrezikun kardiovaskular, por nga të dyja presioni i gjakut sistolik është padyshim faktori më i rëndësishëm i rrezikut tek të rriturit,” tha bashkëautori i studimit Dr. Paul Whelton.

Leximi sistolik, i cili përfaqëson forcën e gjakut kundër mureve të arterieve kur zemra tkurret, është një faktor kryesor rreziku për sëmundjet kardiovaskulare për njerëzit mbi 50 vjeç, sipas Shoqatës Amerikane të Zemrës. Leximi i ulët diastolik mat presionin në arterie ndërsa muskuli i zemrës pushon midis rrahjeve.

Një lexim normal sistolik është zakonisht 120 mm Hg ose më poshtë, por tenton të rritet pasi enët e gjakut dobësohen dhe ngushtohen me kalimin e moshës. Një lexim normal diastolik është nën 80 mm Hg, por fillon të bjerë me kalimin e moshës, pasi arteriet humbasin elasticitetin e tyre dhe ngurtësohen, duke çuar ndonjëherë në një rritje të pulsit.

“Alkooli nuk është sigurisht shkaktari i vetëm i rritjes së presionit të gjakut, megjithatë, gjetjet tona konfirmojnë se kontribuon në një mënyrë kuptimplotë, – tha Vinceti, gjithashtu një profesor ndihmës në departamentin e epidemiologjisë në Shkollën e Shëndetit Publik të Universitetit të Bostonit, – ndaj këshillohet kufizimi i marrjes së alkoolit madje shmangia e tij është edhe më mirë”.

Koncepti se alkooli i tepërt rrit presionin e gjakut ka ekzistuar për një kohë të gjatë, – tha Dr. Andrew Freeman, – megjithatë, ky rishikim zbuloi se edhe nivelet relativisht të ulëta të alkoolit ndikojnë në presionin e gjakut. Pra, ky është një studim tjetër që tregon se mund të mos ketë ndonjë sasi të sigurt alkooli.

Rreziku rritet me rritjen e nivelit të alkoolit

Rishikimi analizoi të dhënat nga shtatë studime të kryera në Japoni, Korenë e Jugut dhe Shtetet e Bashkuara midis 1997 dhe 2021. Ai ndoqi më shumë se 19,000 të rritur nga mosha 20 deri në rreth 70 vjeç, të cilët nuk kishin pasur diagnoza të mëparshme të alkoolizmit, pirjes së tepërt, sëmundjeve kardiovaskulare, diabetit ose sëmundje të mëlçisë gjatë një periudhe mesatare kohore pesëvjeçare.

Të gjithë pjesëmarrësit u pyetën në lidhje me marrjen e tyre tipike të alkoolit në fillim të studimeve, e cila u përkthye në gram alkool për të shmangur dallimet midis vendeve se çfarë përbën një “pije standarde”. Organizata Botërore e Shëndetësisë, për shembull, vendos standardin në 10 gram alkool për pije, ndërsa SHBA e përkufizon atë si 14 gram.

Pirja e një mesatare prej 12 gramësh alkool në ditë, ose më pak se një pije standarde amerikane, prodhoi një rritje të vogël të presionit sistolik prej 1.25 mm Hg gjatë një mesatare prej pesë vjetësh.

“Ne ishim disi të befasuar kur pamë se konsumimi i një niveli të ulët të alkoolit lidhej gjithashtu me ndryshime më të larta të presionit të gjakut me kalimin e kohës në krahasim me mungesën e konsumit – edhe pse shumë më pak se rritja e presionit të gjakut që shihet tek ata që pinë shumë”, tha Vinceti.

Tek njerëzit që konsumonin mesatarisht 48 gram alkool në ditë, ose gati 3,5 pije standarde amerikane, presioni sistolik i gjakut u rrit gati 5 mm Hg gjatë të njëjtit hark kohor krahasuar me ata që nuk pinë. /Skynews/

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.