Strehimi në banesat e reja ka rënë ‘në kurth’

Nga Gisela Troplini - Fatjon Hysenbelliu, drejtues i kompanisë së pasurive ta patundshme “Future Home” thotë për Gazetasi.al se nga ndërtimet e reja në kryeqytet, shumë pak janë për të përmbushur nevojat për strehim që ka tregu, më pak se gjysma.

“Nisur nga analizat qe ne bëjmë duket sikur ka shume asete të lira, por në fakt është ndryshe realiteti. 40% e këtyre objekteve i marrin pronaret e tokës të cilët kanë lënë pasuritë e tyre për të zhvilluar këto projekte. 60% e të gjithë këtij boom-i është për tregun e blerëseve apo për strehim”, tregon Hysenbelliu duke shtuar se edhe në pjesën e mbetur për strehim, një tjetër 20% mbahet nga vetë investitorët për kapital personal apo cash flow në vazhdimësi.

“Pra sot në treg realisht 40% i këtij boom-i ndërtimesh janë për strehim pjesa tjetër është kanalizuar në një formë të tillë  ndërmjet investitorëve dhe pronarëve të tokës ku zhvillohet objekti.”

Përveç kësaj skeme, që ul numrin e objekteve për banim, të vlefshme për qytetarët, gjatë vitit të shkuar indeksi Ficher i Bankës së Shqipërinë, (publikimi i fundit), raportonte një ulje të numrit të banesave që mund të blihen apo merren me qira. Nga komunikime të tjera të Gazetasi.al, të njëjtën gjë kanë konfirmuar edhe agjentë të tregut. Zhvillim ky që në parimet ekonomike, shton më shumë presion ndaj çmimeve, që rrjedhimisht do të rëndojë më tepër xhepat e qytetarët më të brishtë.

Hysenbelliu shpjegon se nëse çmimet aktuale të banesave zgjasin, do të sfidojnë investitorët që blejnë për herë të parë një pronë. Ai thotë se është një efekt domino që përfshin edhe rritjen e normës së interesave dhe tatimin e shitjeve të pronës. 

“Shtresat që preken më shumë në këtë moment janë të varfrit apo ata që kërkojnë të investojnë me kreditim, që po bëhet shumë e vështirë nga çmimet e kredive. Sot një familje normale e ka akoma më të vështirë të investojë në një aset duke parë edhe përqindjet e kredive bankare apo dhe vështirësitë që po hasin shitësit individualë me pagesën e Tatimit mbi Pronën e cila është sa 15% e vlerës së shitjes. Kjo i bën një pjesë të madhe të blerësve me kredi të mos arrijnë të blenë pronën e tyre dhe shitjet e aseteve të lëvizin me një ritëm më të ngadaltë në raport me vitin 2022”, shpjegon drejtuesi i “Future Home”.

“Sa më shumë të zgjasë periudha e rritjes, aq më e thellë do të jetë kriza që pason”, argumentonte ekonomisti amerikan, Hymen Minsky. Konkluzion që përmbledh ngjarjet e fundit në tregun imobiliar europian.

Ky është skenar i mundshëm edhe për vendin tonë. Hysenbelliu thotë se ka disa sinjale për rënie çmimesh dhe një kërkesë më të ulët.

“Tre mujori i parë i vitit 2023-shit ka pasur një rënie të lehtë në kërkesën për blerje apartamentesh. Nisur kjo nga statistikat e ASHK-së, por edhe nga volumi i telefonatave që kemi ne në Future Home. Në pritshmëritë tona kjo mund të ndikojë në një stacionim të çmimeve në zonat periferike dhe një rënie e vogël në zonat elitare, deri në 5% të vlerës që sot tregu ka. Kërkesa aktualisht është zbehur dhe pritet përsëri një rënie e vogël e blerësve potencial gjithë industrinë imobiliare. Do të ketë fuqi për të blerëse, por ndoshta jo me ritmin e vitit kaluar”, detajon ai për Gazetasi.al.

Për të, një stacionim i çmimeve është ogurbardhë dhe për të ardhmen.

“Në afatgjatë e shohim me optimizëm që ekonomia mund të ketë një stacionim, por jo regres apo kolaps në investim, duke parë që masa më e madhe e investitorëve janë remitanca dhe jo nga tregu vendas. Sot Tirana është në boom-in e zhvillimit të ndërtimit dhe çdo investim po ecën normalisht, kjo klimë i motivon investitorët”, përfundon ai për Gazetasi.al.

Lajme të lidhura

• A jemi afër zhvlerësimit të tregut të banesave në Shqipëri?
• Shtëpitë - Ndërtimi në Shqipëri po varfëron më të varfrit