Sokol Cikalleshi po shijon momentin. Pas dy golave të shënuar me fanellën e Kombëtares, ndaj Francës dhe Islandës, sulmuesi kavajas ka shënuar në dy ndeshje radhazi në Turqi me skuadrën e tij, Akhisasporin, në ligën e dytë. Një javë më parë “bomberi” realizoi me penallti ndaj skuadrës së portierit Gentian Selmani, kurse dje shënoi në fitoren 3-1 ndaj Hatajsporit.
Akhisaspori po vuante për të ruajtur avantazhin 2-1 dhe në kohën shtesë Cikalleshi “vulosi” gjithçka me një veprim të bukur teknik brenda zonës. Sulmuesi kuqezi luajti titullar, ndërsa skuadra e tij qëndron në pozita kryesuese me 10 pikë pas 5 javësh kampionat. Ishte goli i 4-t për Cikalleshin brenda dy javësh, ku ai ka luajtur në 4 ndeshje, 2 me Kombëtaren dhe 2 me Akhisasporin.
Në Itali, Tomas Strakosha dhe Berat Gjimshiti luajtën nga 90 minuta me skuadrat e tyre. Portieri i Lacios nuk ishte në lartësinë e duhur edhe në fitoren 2-0 ndaj Parmës së Kastriot Dermakut. Strakosha, ashtu si në Ligën e Europës, ku bëri disa gabime, edhe ndaj Parmës nuk ishte shumë i kthjellët, por fati i tij ishte që Lacio nuk pësoi gol mbrëmjen e së dielës. Dermaku e ndoqi ndeshjen nga stoli. Një ndeshje të mirë ka zhvilluar Gjimshiti në barazimin 2-2 ndaj Fiorentinës. Mbrojtësi kuqezi bëri mirë detyrën e tij, duke mbuluar zonën e vet dhe duke luftuar fort në ajër. Elseid Hysaj, i rikthyer nga dëmtimi, qëndroi në stol në fitoren 1-t të Napolit ndaj Leçes.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.