Sulmuesi i Mançester Sitit, Rahim Sirling, është bërë protagonist i një gjesti të veçantë, që brenda pak minutash ka marrë vëmendjen e shtypit britanik dhe ka bërë xhiron e botës. Ai i ka shkruar një letër të shkurtër një tifozi të “qytetarëve”, i cili ka qenë viktimë e racizmit. Futbollisti 24-vjeçar i Anglisë e ka ndjerë në zemër t’i japë kurajë këtij tifozi, viktimë e abuzimeve raciste. Për historinë në fjalë, sulmuesi i ri është informuar nga gjyshja e djaloshit.
Në letrën e dërguar nga Stirling, shkruhet: “I dashur Ethan, gjyshja jote më ka treguar së fundi për periudhën e vështirë që po kalon, për shkak të abuzimeve raciste ndaj teje. Kujto gjithmonë se duhet të jesh krenar për atë që je dhe mos lejo të të shkurajojnë. Bëhu i fortë, gjyshja jote është krenare për ty! Me dashuri, Rahim Stirling”. Një letër, që është bërë virale në Angli pas fitores së Mançester Sitit në “Carabao Cup” kundër Bërtonit, me rezultatin e thellë 9-0.
Në muajin dhjetor, vetë Stirling ishte në qendër të një episodi racist gjatë ndeshjes me Çelsin. Telekamerat e televizioneve angleze kishin fiksuar tifozët vendës, të cilët i drejtoheshin me fjalë fyese dhe epitete të ndryshme raciste futbollistit, ndërkohë që ai ishte duke kryer një rivënie anësore. Këta tifozë janë identifikuar nga policia, ndërsa Çelsi u ka pezulluar atyre abonimin për ndeshjet që ekipi luan në fushën e tij.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.