Fatjon Rupi – Silvinjo e ka fituar me pikë të plota pjesën e parë të ‘intervistës së punës’. Trajneri i ri i kuqezinjve ka plotësuar gjithë kriteret jashtë fushe, nuk ka mbetur askush pa evidentuar anët e tij pozitive, që në fakt e bëjnë pak ndryshe nga paraardhësit.
Silvinjo është social, energjik dhe pozitiv. Kjo nuk mund të mohohet, ndaj dhe në sytë e lojtarëve, futbolldashësve dhe jo vetëm, ai është prezantuar si një personazh mjaft simpatik. E kundërta e Kristjan Panuçit, një ish-trajner i kuqezinjve, me të cilin afrohet më shumë nga mosha.
Bashkë me ndihmësit Zabaleta dhe Doriva braziliani ka krijuar një atmosferë pozitive në skuadër, shumë e nevojshme për të ecur përpara. I qeshur, komunikues dhe shumë aktiv në fushën e blertë në praktikimin e ushtrimeve. E gjitha kjo energji e dallon thelbësisht nga Edi Reja, trajneri i fundit i Kombëtares.
Por a mjafton kjo për trajnerin e Shqipërisë? Sigurisht që jo. Tani vjen pjesa më e vështirë e ‘intervistës’ për Silvinjon, ajo tekniko-profesionale. Nga ndeshja e Varshavës braziliani duhet të kompletojë profilin e duhur për të udhëhequr kuqezinjtë, duhet të bindë edhe në aspektin teknik.
Në të kundërt, gjithë anët e mira të trajnerit, të përmendura më sipër, do të mbeteshin vetëm në aspektin human. Ajo që na intereson më shumë ka të bëjë me rezultatet dhe filozofinë e lojës. Që Shqipëria të shkojë për herë të dytë në Europian, duke sfiduar dy kombëtare të mëdha si Polonië dhe Çekia. Me gjeneratën e lojtarëve që kemi, besojmë se mund ta arrijmë.
Është një sfidë në fakt edhe për vetë Silvinjon, sepse nga eliminatoret e Euro 2024 varet e ardhmja e tij. Është një mundësi e artë që braziliani të lançohet në botën e trajningut dhe që Shqipëria të stabilizojë stolin jo vetëm për një fushatë kualifikuese.
Në fund të fundit, për Silvinjon dhe stafin e tij FSHF ka shpenzuar më shumë se çdo herë tjetër. Ndeshja e Polonisë do të na tregojë Silvinjon tjetër, atë që na intereson më shumë, Silvinjon si teknik. Mund të mos mjaftojë një 90-minutësh, por sinjalet e para do të duken patjetër.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.