Gazeta Si - Përballet nesër me Romën në finalen e Ligës së Konferencës në Tiranë. Trajneri i Fejnordit, Arne Slot, i druhet faktorit Mourinjo, por pohon se të tijtë duhet të përqendrohen më shumë te skuadra në fushë dhe jo trofetë e portugezit.
"Mourinjo ka fituar shumë finale, por duhet të përqendrohemi te taktika e skuadrës së tij, si luan ajo në fushë – thekson Slot. – Nuk duhet të merremi shumë me faktin sa finale ka fituar Mourinjo.
Roma luan mirë, sidomos në ndeshjet e rëndësishme. Kjo është parë qartë në ndeshjet me eliminim direkt të kompeticionit”, - ka theksuar më tej trajneri holandez për faqen zyrtare të UEFA-s.
"Vetëm skuadrat më të mira shkojnë në finale. Prandaj është logjike se do të përballemi me një skuadër mjaft të fortë. E njëjta gjë vlen edhe për Romën: edhe ata duhet ta dinë se ndeshen me një kundërshtar të fortë”, - ka shtuar më tej Slot.
On our way to the #UECLfinal 🤙#RoadToTirana https://t.co/wKVHPDm8XA pic.twitter.com/ST3R0wlDec
— Feyenoord Rotterdam (@Feyenoord) May 24, 2022
Çfarë futbolli luan Fejnordi i tij? “Jemi një skuadër me një mentalitet sulmues. Na pëlqen të mbajmë topin dhe të luajmë me intensitet të lartë. Kur nuk e kemi topin, duam ta rimarrim sa më shpejt dhe bëjmë presing agresiv.
Mendoj se Fejnordi është një skuadër e vështirë për t’u mundur. Ky grup ka kualitetin për të fituar trofe. Nuk fituam titullin ose kupën, por kemi ende një shans në Europë.
Djemtë duhet të jenë të ndërgjegjshëm se kjo skuadër ka potencialin për të fituar diçka. Këtë duhet ta tregojmë të mërkurën në mbrëmje,”, - ka përfunduar trajneri i Fejnordit, Arne Slot.
Stafi teknik i ekipit holandez ka preferuar që të zhvillojë edhe një seancë të fundit stërvitore sot në stadiumin “Air Albania”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.