.png)
Protesta e studentëve ka lënë në plan të dytë një lajm të shpërndarë me shpejtësi nga mediat ndërkombëtare, e që lidhet drejtpërdrejtë me sigurinë e dhjetra punonjësve të Shërbimit Informativ Shtetëror dhe vetë kombit shqiptar.
‘The Independent’ publikoi në orët e pasdites së të shtunës një artikull me titull “Shqipëria, anëtare e NATO-s publikon të dhënat sekrete në rrjet”. Artikulli i referohet publikimit në faqen zyrtare të Ministrisë së Financave të të dhënave diskrete të ‘spiunëve’ shqiptarë, jo vetëm brenda vendit, por edhe në Serbi, Greqi dhe vetë zyrat qendrore të NATO-s në Bruksel.
Duke cituar në kushte anonimati një agjent të CIA-s, ‘The Independet’ e cilëson këtë një amatorizëm që bëhet në kuadër të ‘transparencës’, ndërsa i referohet edhe deklaratës, po në kushte anonimati të një zyrtari shqiptar të SHISH.
“Ne jemi të detyruar sipas rregullores së transparencës që të deklarojmë shpenzimet tona”, thotë ai për mediat prestigjoze britanike. Të dhënat e publikuara në faqen e internetit të Ministrisë së Financave japin numrin e kartës së identitetit të punonjësve të SHISH, arsyet se përse janë derdhur paratë për llogari të këtyre personave përgjatë 2018, e deri tek ‘emri’ i koduar, ose emri i vërtetë i agjentit në terren.
Gazeta ‘Si’ ka siguruar të dhënat në fjalë, që janë mbi 228 dosje në formatin “Exel” dhe në ditët në vazhdim do të sjellë një material më të hollësishëm për këtë temë duke hedhur dritë se sa rrezikohen punonjësit e SHISH brenda, por sidomos jashtë vendit nga kjo “transparencë” e qeverisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
