Gazeta Si – Nga fjalët te veprat. Silvinjo, trajneri i ri i Kombëtares shqiptare, bëri të ditur se do të qëndrojë në Shqipëri për t’i dhënë më shumë seriozitet misionit të tij në krye të kuqezinjve. Ai nuk ka humbur kohë dhe ka nisur menjëherë punën në terren.
Braziliani ka vendosur të ndjekë nga afër ndeshjen mes Partizanit dhe Vllaznisë, që luhet nesër në kryeqytet. Trajneri kërkon të prekë realitetin shqiptar, të njihet drejtpërdrejt me nivelin e kampionatit tonë elitar. Kjo është vetëm ndeshja e parë që do të jetë nën monitorimin e tij.
Në radhët e Partizanit dhe Vllaznisë janë disa lojtarë, si Skuka, Cara, Hadroj, Gurishta e ndonjë tjetër, që ish-trajneri Reja i grumbulloi dhe aktivizoi në miqësoret e fundit. Me siguri trajneri i ri do të mbajë shënime për të ardhmen.
Silvinjo do të shohë gjendjen e çdo lojtari që mund t’i bëjë punë. Kohën në fakt e ka të limituar, sepse ndeshja e parë kualifikuese me Poloninë po afron. Dhe gjendja aktuale nuk është aq e mirë, sepse janë dëmtuar lojtarë shumë të rëndësishëm, si Armando Broja, Keidi Bare dhe Ardian Bajrami.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.