.png)
Gazeta Si - Trajneri i Kombëtares, Silvinjo, ka folur sot për ndeshjen e nesërme me Moldavinë, ku kërkon me ngulm fitoren e parë në stolin kuqezi.
“Grumbullimi me Poloninë ishte i gjatë, por këtë radhë kemi një avantazh të vogël, sepse i njohim më mirë lojtarët. Jam i kënaqur nga angazhimi i lojtarëve. Kemi punuar mirë, duhet t’i menaxhojmë sa më mirë lojtarët, është puna jonë për të pasur një rezultat sa më të mirë.
Me presionin jemi mësuar. Kemi përpara shtatë finale dhe nesër është e para, duhet të fitojmë me çdo kusht. Kemi ndihmën e tifozëve, do të jetë bukur me stadiumin plot. Skuadra duhet të propozojë lojën e saj, një skuadër që lufton, që mbron mirë dhe sulmon, me ekuilibër. Kemi një grup, që shkon në fushë me shumë dëshirë për të bërë mirë.
Jam i bindur për ekipin që do të hedh në fushë dhe besoj se do të bëjmë një ndeshje të madhe. Sadiku? Ai është një lojtar zone, që shënon. Kam folur me të dhe kam vendosur ta marr. Kemi dy ndeshje përpara dhe kemi marrë shumë lojtarë. Edhe Muçi më pëlqen shumë", - ka theksuar mes të tjerash trajneri brazilian i kuqezinjve.
Hysaj: Kemi sulmues të mirë, duhet vetëm qetësi
Në konferencën për shtyp foli edhe kapiteni Elseid Hysaj, i cili u shpreh se Kombëtarja është gati për fitoren e parë në këto eliminatore: "Moldavia ka skuadër të mirë, ka kualitet. Ne thjesht duhet të jemi të qetë në fushë, të bëjmë ato që po bëjmë në stërvitje. Jam më mirë djathtas, jam më i qetë. Nuk ka ndeshje të lehta, të gjithë e dimë dhe nuk duhet të na marrë entuziazmi i tifozëve. Kemi lojtarë të mirë sulm dhe duhet të shkojmë te fitorja.
Kemi qejf të kualifikohemi, kemi dëshirë, por duhet ta tregojmë në fushë. Nëse luajmë si me Poloninë, them se do të kemi një rezultat të mirë. Risia? Po kuptojmë më shumë trajnerin, kemi taktikat tona de duam t'i shfrytëzojmë për të marrë pikët".
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
