Shtohen infektimet me Covid, ISHP: 1200 të sëmurë në javë, por nuk ka raste të rënda

Nga Gazeta Si- Java e fundit është mbyllur me trend të lartë i përhapjes së Covid në vendin tonë.

Burime zyrtare nga Instituti i Shëndetit Publik thonë se gjatë javës së kaluar janë regjistruar 1200 raste të reja me Covid-19.

Sipas të dhënave zyrtare nga ISHP, këtë javë që u mbyll nuk ka patur vdekje të regjistruara nga Covid, duke theksuar se rastet e reja janë jo të rënda.

“Gjendja e pacientëve paraqitet e lehtë. Simptomat më të shpeshta janë me dhimbje fyti, trupi dhe temperaturë të moderuar deri në 38.5”, thotë për Gazetasi.al n/drejtori i ISHP-së Dritan Ulqinaku.

Mendohet se rritja e rasteve të reja me Covid-19 lidhet me nisjen e vitit të ri shkollor 2023-2024, por ekspertët e shëndetit publik thonë se situata po monitorohet dhe në ditët në vazhdim do të ketë të dhëna të tjera për situatën epidemiologjike në vend.

“Në ajër ka qarkullim jo vetëm të Covid-19 por dhe virozat e stinës, siç janë ato të aparatit të frymëmarrjes dhe aparatit të tretjes. Një analizë e thjeshtë gjaku ose një tampon mund të vërtetojë prezencën ose jo të Covid, për të përcaktuar më pas terapinë nga mjeku specialist”, thotë n/drejtori i ISHP Dritan Ulqinaku.

Sipas tij, me trendin e lartë të rritjes së numrit të rasteve me Covid, po planifikohet fushata e vaksinimit tek kategoritë vulnerabël, pacientë kronikë dhe fëmijët.

“Doza përforcuese ose doza e tretë shihet më e nevojshme në këtë periudhë për tu aplikuar, por mbetet në zgjedhjen e qytetarëve ta aplikojnë. Me rëndësi po shihet vaksinimi i fëmijëve duke qenë se janë kontigjenti me numrin më të ulët të vaksinimit”, thotë Ulqinaku.

Sipas të dhënave të OBSH-së, në të gjithë botën janë raportuar mbi 770 milionë raste dhe 6.956.000 vdekje me burim të Covid-19 që nga nisja e pandemisë.

Shtrimet në spital, më shumë viroza respiratore

Në spitalet publike, spitali universitar “Shefqet Ndroqi” dhe spitali infektiv në QSUT, nuk ka pacientë në gjendje të rëndë prej Covid. Burime nga dy spitalet i thanë “Gazeta Si” se aktualisht shtrimet në pavione janë raste të pneumonive kronike, ku kryesisht janë pacientë mbi 60-vjeç që vuajnë prej kësaj sëmundje. Gjithashtu në pavion ka dhe pacientë me insuficencë respiratore, ku ka patur dhe raste në reanimacion, por jo të rënda.

“Duhet thënë se ne vijojmë të punojmë në kushte normale, pa kapacitete të shtuara. Shumica e rasteve të shtruara janë pacientë kronikë që bashkëjetojnë me sëmundjen e insuficencës respiratore ose azma bronkiake. Për rastet e Covid, gjendja rëndohet vetëm kur pacientët që vuajnë nga këto sëmundje preken dhe nga covid. Por nuk ka raste të rënda deri më tani”, thanë burimet për “Gazeta Si”.

Në spitalin infektiv në QSUT, nuk ka më ndarje të pavioneve vetëm për COVID-19, çka tregon relaksimin e spitalit pas normalizimit të situatës së pandemisë.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.