.png)
Nga Gazeta 'SI' - Konsumatorët shqiptarë nuk ishin të gatshëm të bënin blerje të mëdha as gjatë dhjetorit të festave. Besimi i tyre në ekonomi sipas anketës së Bankës së Shqipërisë ishte i njëjtë me atë të nëntorit.
As për tregtarët nuk raportohen ndryshime nga nëntori në dhjetor, që do të thotë se mbeten pesimistë për ekonominë. Ata presin rënie të aktivitetit, por rritje të çmimeve.
Ndërkohë, ndërtimi dhe shërbimet, si dy sektorët kryesorë të ekonomisë së vendit u raportuan më optimistë.
Besimi i bizneseve ndërtuese pati rritjen më të lartë, me 9.1 pikë përqindje nga nëntori, lidhur më rritjen e kërkesës si edhe pritshmëritë për rritje të punësimit e të punësuarve.
Bizneset e shërbimit patën një rritje me 2.6 p.p, pasi parashikojnë rritje të kërkesës, punësimit dhe çmimeve.
Besimi në industri pati një rritje të papërfillshme, me vetëm 0.5 p.p nga nëntori. Këto biznese nuk presin ndryshim në punësim e as në çmime. Parashikojnë rritje të kërkesës.
Në tërësi treguesi i ndjesisë ekonomike u rrit me 2.2 pikë në muajin dhjetor 2023, ndikuar kjo më së shumti nga ndërtimi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
