.png)
Nga Gazeta Si - Në shumë vende të BE-së dhe të rajonit si Maqedoni e Veriut, Kosovë, Greqi dhe së fundmi edhe në Mal të Zi, është prezente sëmundja e murtajës afrikane të derrave si dhe gripi i shpendëve. Kjo ka bërë që dhe vendi ynë të marrë masa për të parandaluar që ky virus të futet në vend, duke ndaluar importin e derrave dhe shpendëve.
Ministria e Bujqësisë dhe Zhvillimit Rural njofton se në vendin tonë nuk ka asnjë rast të shfaqur të këtyre sëmundjeve.
Sëmundja e Murtajës Afrikane të derrave (ASF), shkaktohet nga një virusi i familjes Asfaviridae dhe është shumë ngjitëse që prek derrat shtëpiak dhe ato të egër, ku shkalla e vdekshmërisë së të cilëve mund të arrijë deri në 100%.
Kjo sëmundje nuk përbën rrezik për shëndetin e njerëzve, por ka efekte shkatërruese në popullatën e derrave dhe ekonomi.
Virusi i kësaj sëmundje është shumë rezistent në mjedis, që do të thotë se mund të mbijetojë në rroba, çizme, rrota dhe materiale të tjera dhe mund të mbijetojë edhe në produkte të ndryshme të derrit dhe nënprodukte.
Është parë që virusi i ASF mbijeton në mish, mish i grirë dhe të brendshme 105 ditë, mish i kripur 182 ditë, mish i thatë, lëkurë yndyrë 300 ditë, mish i ngrirë 1000 ditë dhe inaktivizohet në mishin e zier (30 minuta në 70 gradë), dhe feçe në temperaturën e dhomës 11 ditë. Mbijetesa e virusit në produktet e mishit, është faktori potencial për transmentimin e Murtajës Afrikane të derrave.
Ndërkohë ifluenca aviare është një sëmundje virale me kontagiozitet të lartë që shkaktohet nga virusi i familjes Orthomyxoviridae, tipi A. Viruset e tipit A janë të vetmit ortomiksovirusë të njohur që prekin shpendët. Ata ndahen në dy grupe, mbi bazën e aftësive të tyre për të shkaktuar sëmundje në speciet e ndjeshme:
Virusi i sëmundjes së influencës aviare me patogjenitet të lartë (HPAI), të cilët shkaktojnë infeksion të gjeneralizuar në shpendët e prekur, kanë mortalitet të lartë (deri në 100%). Viruset me patogjenitet të lartë (HPAI) sic është H5N1, egziston mundësia e transmetimit te njeriu.
Virusi i sëmundjes së influencës aviare me patogjenitet të ulët (LPAI) që shkakton shenja të lehta në rrugët e sipërme të frymëmarrjes në shpendë.
Me qëllim mbrojtjen e territorit nga hyrja e virusit të Murtajës Afrikane të Derrave, Ministria e Bujqësisë dhe zhvillimit Rural ka marrë disa masa të menjëhershme siç janë, ndalimi dhe tranzitimi në Republikën e Shqipërisë të ngarkesave me kafshë të gjalla, produkteve te tyre, materialit biologjik, embrioneve të kafshëve të llojit derra, mishin e freskët dhe nënproduktet e tyre, nga vende, zona dhe territore ku është shfaqur sëmundja, bazuar nga njoftimet e marra nga Organizata Botërore e Shëndetit të Kafshëve dhe nga sistemi elektronik i informacionit të sëmundjeve të kafshëve të BE-së.
Aktualisht urdhrat e miratuara për sëmundjen e ASF janë për shtetet si më poshtë: Kosovë, Italia, Letonia, Moldavia, Polonia, Suedia, Ukraina, Estonia, Bosnja, Serbi, Bullgari, Rumania, Kroaci, Greqi, Gjermani, Hungari, Sllovaki, Ceki, Maqedonia e Veriut.
Për zbulimin e hershëm të sëmundjes dhe parandalimin e përhapjes së saj, është miratuar dhe po zbatohet Programi Kombëtar i mbikqyrjes së sëmundjes së Murtajës Afrikane të Derrave, program që zbatohet në të gjithë territorin e vendit.
Për sëmundjen e Influencës Aviare (që njihet ndryshe si gripi i shpendëve) zbatohet i njëjti parim si për Murtajen Afrikane.
Ndërsa vendet për të cilat është urdhëruar bllokimi i shpendëve, materiali biologjik i tyre, vezët, mishi dhe nënproduktet e tyre të patrajtuara termikisht janë Danimarka, Franca, Gjermania, Hollanda, Hungaria, Italia, Polonia, Cekia, Belgjika, Bullgaria, Moldavia, Sllovakia, Rumani, Kroaci, Spanjë dhe Portugali.
Urdhrat janë me efekt të përkohshëm, dhe me marrjen e masave për çrrënjosjen e sëmundjeve nga këto vende dhe mbylljen e vatrës në sistemin e Organizatës Botërore të Shëndetit të Kafshëve, ato shfuqizohen.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
