Një lajm bombastik merkatoje nga Spanja. Sipas të përditshmes “Sport”, Interi dhe Barcelona janë shumë afër një shkëmbimi lojtarësh në huazimi në janar. Në Milano do të kalojë Luk De Jong, kurse në Katalonjë do të shkojë Aleksi Sançez, me miratimin e Seviljes, që ka në pronësi kartonin e sulmuesit holandez. Pritet vetëm “ok”-i i trajnerit Ksavi.
Trajneri Simone Inzagi e ka komplimentuar Sançezin pas ndeshjes së fundit, duke theksuar se të gjithë i dinë vlerat e tij, por kjo nuk do të thotë se e ardhmja e sulmuesit kilian nuk ndryshon pas kësaj deklarate. Ai tashmë është shumë pranë një rikthimi me fanellën e Barcelonës.
Shkëmbimi ka lindur si nevojë e Barcelonës për t’u liruar nga Luk De Jong, i marrë në huazim në sekondën e fundit nga Sevilja për të mbushur boshllëkun e lënë nga largimi i Grizmanit. Holandezi nuk pëlqehet nga trajneri Ksavi, sepse nuk i përshtatet lojës së tij, kurse Inzagi do të kishte në dispozicion një zëvendësues për Xhekon.
Në Katalonjë, ku ka lënë kujtime të mira, me 141 ndeshje dhe 47 gola, Sançez do të gjente në stol ish-shokun e skuadrës dhe një mënyrë loje që u përshtatet më shumë karakteristikave të tij.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.