.png)
Kryeministri Edi Rama e cilësoi të papërgjegjshëm kreun e Partisë Demokratike, Lulzim Basha dhe kërkoi prej qytetarëve që të mos e marrin si shembull, por të respektojnë rregullat e vendosura për mospërhapjen e koronavirusit.
Në një lidhje të drejtpërdrejtë me ndjekësit e tij në rrjetet sociale Facebook dhe Instagram, Rama e nisi fjalën duke komentuar edhe dy gjobat që i janë vendosur kreut të opozitës për shkelje të rregullave anti-Covid19.
“Ajo që ndodhi me kryetarin e PD-së në Durrës dhe mbrëmë në të ashtuquajturin shesh të mbrojtjes së identitetit kulturor është përtej çdolloj konceptimi që të ndodhë. Ka një ligj dhe janë të gjithë gjërat me ligj njëlloj për të gjithë, që do të funksionojnë edhe për kryetarin e PD-së dhe të gjithë. Këtu problemi është çfarë pasojash mund të kemi nga këto grumbullime dhe sjellje të papërgjegjshme, prandaj mos merreni shembullin e kryetarit të PD-së. Mund të jeni në simpati të plotë me temat, por në asnjë mënyrë me sjelljen e tij në çdo aspekt. Nuk e bën kurrkush në botë, një person që ka përgjegjësi publike", deklaroi Rama.
Kryeministri mohoi akuzat se po e shfrytëzon gjendjen e fatkeqësisë natyrore për të shtypur protestat e qytetare dhe për të goditur opozitën.
“Na thonë se nuk po lejon hapjen se ke frikë nga protestat. Lërini këto broçkulla. Të mos merremi me llafe, jo janë hapur të gjithë, jo të gjithë janë duke bërë jetën normale. Ne faktikisht nga e hëna, përveç transportit publik, aktiviteteve sportive e kulturore në mjedise të mbyllura, nuk do ketë asgjë të tjetër të mbyllur”, tha Rama.
Sa i takon hapjes, kreu i Qeverisë përsëriti se turizmi dhe transporti publik mbeten dy sektorë me rrezik të lartë. Për transportin publik nuk dha asnjë sinjal se kur dhe si mund të hapet, ndërsa për turizmin sinjalizoi se hapja nuk do të vonojë, por me kushte të forta sigurie dhe distancimi fizik.
"Nuk e imagjinojmë një sezon pa turistë, por duhet të jemi të qartë se nuk do të jetë si vitet e tjera. Do të duhet të pranojmë disa kufizime që në kushte normale janë absurde. Nuk mundet që për hir të 15 ditëve plazh të mbushim spitalet dhe të biem në gropë. Nuk mundemi që shkojmë në një rimbyllje totale”, tha ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
