Pas katër muajsh në arrati, është arrestuar Mitri Prifti, i cili më 29 maj të këtij viti tentoi të vrasë me armë zjarri Edison Begajn, ngjarje e ndodhur në fshatin Kaninë të Vlorë.
Më herët, Gjykata e Shkallës së Parë në Vlorë i ka caktuar masën e sigurisë “Arrest me burg” për veprat penale “Vrasja me paramendim”, e mbetur në tentativë dhe “Armëmbajtja pa leje”.
Arrestimi i Priftit është bërë në bashkëpunim me policinë e Tiranës, e cila ka zbuluar vendndodhjen dhe ka bërë të mundur ndalimin e 36-vjeçarit, duke e sjellë më pas drejt Vlorës.
Shkak i atentatit dyshohet se u bë një përplasje që kishin pasur Begaj dhe Prifti me njëri-tjetrin në zonën e Lungomares në Vlorë.
Të dy ishin konfliktuar në një lokal dhe më pas Begaj e ka qëlluar Priftin me shuplakë. Për këtë shkak pak ditë më vonë Prifti ka bërë atentatin.
Plagosja e Begajt ndodhi pranë banesës së tij, ku të pranishëm ishin edhe fëmijët e tij, ndërsa autori ishte i veshur si polic.
41-vjeçari mori 4 plumba në gjymtyrët e poshtme të trupit, por mundi të shpëtojë.
Edison Begaj është emër i njohur për drejtësinë. Dy javë pas atentatit ai u arrestua, ndërsa me vete iu gjet një armë zjarri pistoletë, me një krehër me 5 fishekë, pa leje. Ndërkohë, pak ditë më vonë ai u la i lirë nga Gjykata e Vlorës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.